Kaso vs Tommy O. gibasura

CEBU, Philippines — Gibasura sa Office of the Ombudsman ang mga kaso nga gipasaka sa Cebu City government batok kang kanhi mayor Tomas Osmeña kalabot sa kontrobersyal nga pagkawagtang sa selyo buhatan sa mayor.

Si Atty. Amando Virgil Ligutan, legal counsel ni Osmeña, miingon nga mao na kini ang pagtapos sa gibansagang ‘mayor’s office and missing seal case.’

“The truth is finally out-former mayor Tomas Osmeña was only taking what was his, and the approved plan was to restore the mayor’s office to its prior condition in 2016 when mayor Osmeña took office. But he was prevented to do so. And the other camp took advantage of the incomplete restoration process by exposing it to the media,” nagkanayon si  Ligutan.

Ang 33 ka pahina nga desisyon nga gipirmahan ug giaprobahan ni Ombudsman Samuel Martires nagkanayon nga ang reklamong kriminal batok kang Osmeña ug ubang personalidad gibasura tungod sa “lack of probable cause,” “lack of jurisdiction,” ug “lack of substantial evidence.”

Kahinumduman, ang Building Maintenance Services sa dakbayan pinaagi ni Engr. Mejelito Cajes, nisang-at niadtong Hulyo 8, 2019 og reklamo batok kang Osmeña ug 44 ka laing respondents tungod sa paglapas sa Section 3 (e) sa Republic Act 3019 ug Article 308 sa Revised Penal Code o Theft; Artikulo 327 sa Revised Penal Code o Malicious Mischief; Artikulo 4 (d) sa Republic Act 6713; grave misconduct, grave neglect of duty, conduct unbecoming of a public official and conduct prejudicial to the best interest of the service.

Lakip sa gireklamo ni  Cajes mao sila si Francisco Fernandez, Ronaldo Malacora, Anna Ruby King, Cindy Montermoso, Jimpaul Saavedra, Ventimo Ontong Jr., Lance Samuel Co, Edgardo Ong, Joevert Gio, Benjie Dolino, Pericles Dakay ug ang 32 ka workers sa Dakay Construction and Development Corp.

Si Cajes niangkon nga si Osmeña maoy gitumbok nga utok sa “destruction” ug “demolition” sa Office of the Mayor nga iyang gibakante niadtong Hunyo 30, 2019 human nakadaog niadtong higayona si kanhi Mayor Edgardo Labella.

Iyang gilista ang selyo sa opisina sa mayor isip usa sa mga butang nga giingong gikuha ni Osmeña ug sa ubang mga respondents gikan sa Office of the Mayor nga nakahatag  og kadaot sa kabtangan sa Dakbayan sa Sugbo nga mokabat sa P857, 713.14. Sa iyang counter-affidavit, si Osmeña nitataw nga walay  malicious mischief nga nahitabo sanglit igo ra niyang gipabalik ang kondisyon sa maong opisina sa dihang iyaha kining gipulihan niadtong 2016.

Sa iyang pagbiya, gipatangtang niya ang iyang mga personal nga butang nga gimuntar diha sa maong buhatan ug walay gipanagiya sa siyudad nga nga iyang gidala.

Si Osmeña miingon nga namakak si Cajes sa dihang nipasangil nga nawala ang selyo sa mayor sanglit ang reklamante mismo maoy mikuha sa opisyal nga selyo sa mayor base sa nakatala sa logbook entry sa security guard nga nag-duty.

Samtang adunay kadaot sa buhatan sa mayor, wala usab kini gihimo aron kini gub-on sumala pa sa desisyon.

Si Osmeña misumbalik og kaso sa mga opisyal sa City Hall ubos sa administrasyon ni Labella tungod sa giingong pagdumili nila pag-uli sa mga butang sa buhatan sa mayor.

Apil sa gikasohan ni Osmeña niadtong Agosto 2019 sa Ombudsman tungod sa paglapas sa Section 3(e) sa Anti-Graft and Corrupt Practices Act, grave misconduct, ug conduct unbecoming of public officials mao silang Labella, kanhi City Legal Officer Rey Gealon, ug kanhi City Administrator Floro Casas Jr. —IBM (BANATNEWS)