Magsuong Arquillano giabswelto sa korte

CEBU, Philippines — Giabswelto sa korte ang duha ka kaso nga gisang-at batok sa managsuong Arquillano sa Lungsod sa San Francisco, Isla sa Camotes.

Ang Regional Trial Court (RTC) Branch 90 sa Dakbayan sa Danao nibasura sa kasong kalapasan sa Akta Republika 9516 kun “Illegal Possession of Explosives” ug Akta Republika 10591 kun “Comprehensive Firearms and Ammunition Regulation Act” batok nila ni San Francisco Mayor Alfredo Arquillano, Jr.  ug Vice Mayor Aly Arquillano.

Si RTC Judge Josefa Pinza Ramos nitugot sa motion nga giduso sa magsuong Arquillano pagkwestiyon sa ebedensiya nga gipresentar sa prosekusyon.

Ang magsuong Arquillano gidakop kini sa mga sakop sa Provincial Intelligence Branch (PIB) ug Provincial Drug Enforcement Unit (PDEU) sa Cebu Provincial Police Office sulod diha sa ilang balay sa Barangay Poblacion, Lungsod sa San Francisco, Isla sa Camotes niadtong Abril 4, 2019.

Niadtong higayona ang mga polis adunay dala nga search warrant nga giluwat ni RTC Judge Leopoldo Cañete sa Branch 10.

Niadtong tuiga, si Aly maoy mayor sa lungsod samtang si Alfredo o “Al” maoy bise mayor.

Kagahapon si Aly mao nay nilingkod nga bag-ong bise mayor sa lungsod samtang si Alfredo mao na usab ang nahimong mayor karon sa lungsod. Ang magsuong Arquillano nasikop kini human giingong nakuhaan og mga armas ug explosives sulod sa ilang panimalay.

Apil sa nakuha nga mga armas ug explosives mao ang kalibre .45 nga pistola, kalibre .22 long rifle ug magazine, usa ka AR 15 rifle nga expired na ang lisensiya, usa ka granada ug pipila ka bala sa kalibre .45 nga pistola ug .9mm nga pistola.

Ang magsuong Arquillano niduso ngadto sa korte og demurer to evidence ug motion to acquit sa kaso.

Ang magsuong Arquillano nangangkon nga ang mga giingong ebidensiya nga nakuha gikan sa ilang balay atol sa operasyon sa kapolisan niadtong Abril 2019  “inadmissible” o dili madawat sa korte; ang search warrant nga giluwat sa RTC sa Lungsod sa Barili ilegal ug pakyas ang prosecution pag-establisar nga adunay krimen nga nahimo ang duha ka opisyal.

“The instant case is hereby dismissed for failure of the prosecution to prove their guilt beyond reasonable doubt. Perforce, accused Aly Aranas Arquillano and Alfredo Aranas Arquillano are hereby acquitted”, tipik sa desisyon ni Ramos nga gipetsahan niadtong Hunyo 24, 2022. —BDB (BANATNEWS)