Mga residente sa siyudad ipaubos sa profiling sa CCDRRMC

CEBU, Philippines — Malikayan na ang mga lalis ug segurado nga duna gyuy klaro nga listahan alang sa mga benepisaryo kun ugaling dunay ayuda ang kagamhanan sa Siyudad sa Sugbo. Mao kini ang tumong sa bag-ong programa nga gilusad sa Cebu City Disaster Risk Reduction and Management Council (CCDRRMC) kun diin ipaubos daan og profiling ang tanang nagpuyo sa siyudad.

Suma pa sa chairman sa CCDRRMC nga si Atty. Gerry Carillo nga pinaagi sa ilang data base, dali ra unya nila maandam ang mga ayuda kun dunay mga kalamidad nga moigo sa usa ka lugar.   Ang pamaagi niini mao ang pagsuta sa gidaghanon sa mga balay ug mahibaw-an usab kun kinsa ang mga namuyo dinhi.

"Example, kun dunay mahitabo nga sunog anang lugara, mahibaw-an dayon namo kun pila ka food packs ang andamon. Dili magkagubot ang lista, kay naa naman ta'y profile sa mga tawo nga naapektohan sa sunog," matud pa ni Carillo.

Suma pa niya nga dunay 250 nila ka mga personnel nga gibahin sa lima ka team ang anam-anam nga motuyok sa tanang 80 ka barangay sa Siyudad sa Sugbo aron mokuha sa impormasyon sa mga miyembro sa matag household. Malikayan na pud ang mga senaryo kaniadto nga dunay mga nagpuyo sa usa ka balay ang wala makadawat og lima ka kilo nga bugas gumikan sa wala nagkadimao nga listahan.

Giklaro hinoun ni Carillo nga dili pinugsanay ang profiling apan iyang gipasalig sa mga niuyon niini nga "secured" ang ilang database. Ang maong senaryo gihimo na sa laing mga nasud hinungdan nga tulin ang pag-apod apod sa ayuda. —MEL (BANATNEWS)