City hall satellite  center ihulip sa Milo

CEBU, Philippines — Gikan sa termino nga Mayor’s Information Liaison Office (MILO), usbon na ang pagtawag niini ngadto sa Cebu City Hall Satellite Center.

Kini maoy plano ni Mayor Michael Rama kinsa nitataw nga dunay himoong inobasyon alang sa maong buhatan.

Dili hinuon mohatag og komento si Rama kalabot sa negatibong reaksyon sa katawhan kalabot sa MILO

gumikan kay nakapunting ang iyang atensyon sa lapad nga kausaban niini.

Matud pa sa mayor nga dili na kinahanglan sugnoran ang mga intriga, ug labing maayo nga atimanon ang

paghatod og serbisyo ngadto sa kabaranggayan nga usa sa prayoridad sa iyang administrasyon.

Giklaro niya nga wala siyay personal nga kalagot sa MILO, tumong lang niya nga ma-level-up kini alang sa

mas tulin ug paspas nga pangalagad.

Ang Cebu City Hall Satellite Center usa sa pamaagi nga mahiduol ang serbisyo ngadto sa katawhan.

Susama ra kini sa programa kaniadto ni Rama nga gitawag og "City Hall at Your Doorstep" . Kahinumduman

nga giumol ang MILO sa panahon ni anhing Mayor Edgardo Labella.

Lakip sa trabaho sa MILO mao ang pagsuta sa panginahanglan sa mga residente ug mopadangat kini direkta

ngadto sa city hall.

Gilangkoban kini sa job order workers nga gidumala sa kagamhanan sa Siyudad sa Sugbo. Kahinumduman nakadawat og nagkalain-laing reaksyon ang pagmontar sa MILO diin ang uban nisaway niini

gumikan kay matud pa nisapaw kini sa ubang trabahoon sa mga opisyales sa barangay.

Sa panahon ni kanhi Mayor Tomas Osmeña, naumol usab kaniadto ang Barangay Mayor's Office (BMO) nga mao usab ang moatiman sa kabaranggayan. (BANAT NEWS)