Kontraktor gibaharan

CEBU, Philippines — Gipahibalo kagahapon ni Konsehal Jerry Guardo nga ipatawag ang mga kontraktor sa pipila ka telecommunication companies (telcos) nga panglamo-lamoan lang ang pag-ayo o pagtabon sa mga karsada nga ilang gipanglungagan matag duna silay himuong repairs.

Sumala pa ni Guardo kinsa mao usab ang chairman sa  committee on infrastructure sa konseho sa Siyudad sa Sugbo nga duna siyay nadawat nga mga reklamo gikan sa mga motorista bahin aning mga libaong ug mga gitrabahong manholes ug uban pa sa mga telcos kay di tarungon og tabon.

Gipasanginlan ang mga kontraktor sa telcos nga nagpabaya lang sa ilang kinawtan. Imbes nga tarungon og tabon o sementuhon og balik ang ilang gipanglungagan, pamiyaan lang kini ug peligro na hinuon sa mga motorista.

Matud pa niya nga kuyaw kaayo sa mga aksidente ang mga ingon niini sa karsada.

Hangyoon usab niya ang maong mga kontraktor sa telcos nga magbutang gyud og klaro nga mga karatola sa higayon nga duna sila’y kasamtangang trabaho aron malikayan ang mga aksidente.

Mibahad si Guardo nga dili niya paisyuhan og work o excavation permits ang mga kontraktor sa mga telcos kun duna silay gitrabaho nga wala tarunga og uli o pending nga trabahoonon.

“Kinahanglan nga tarongon nila og tabon ang ilang kinawtan kun gusto sila maka-proceed sa sunod nila nga trabahoonon,”  matud pa ni Guardo.

 Matud pa ni Guardo nga usa sa iyang gihingosgan karon mao ang pagtarong sa kadalanan sa dakbayan ilabi na ang pagpaaspalto niini ilabi na sa mga barangay roads.

Giawhag ni Guardo ang publiko nga kuhaan og hulagway o videos ang mga libaong, mga gipasagdang proyekto, mga walay takob nga lungag, kanal o libaong sa karsada  ug ipadala sa iyang buhatan o ibutang sa iyang Facebook page aron maaksyon dayon niya.

Ang  sumbong sa katawhan iyaha kining ipainspeksyon sa Department of Engineering and Public Works (DEPW) aron ipatarong. —IBM (BANATNEWS)