Toktok Bakuna gilusad sa CCHD
CEBU, Philippines — Gipahibawo ni Dr. Jeffrey Ibones, Officer-in-Charge sa Cebu City Health Department nga nasugdan na niadtong adlaw’ng Biyernes ang ‘Toktok Bakuna’ aron pangitaon ang mga tawong wala pa magpabakuna sa kabarangayan.
Ang Barangay Lahug maoy giuna nila pagadto aron awhagon kadtong mga wala pa magpabakuna ug bakunahan dayon sila batok Covid-19. Gihimo nila ang ‘Toktok Bakuna’ kay nakita nila nga nimenus na gyud ang nagpabakuna karon sa sa siyudad sa Sugbo diin kada adlaw naa nalang sa 2,000 ngadto sa 3,000 ang ilahang mabakunahan.
Gipaningkamutan sa City Health Department ang mga senior citizens nga magpakuna kontra COVID-19 tungod matud pang Ibones daghan pa kanila ang wala magpabakuna.
“Ato ni silang gipangita ron unya inkaso man ganahan sila magpabakuna ato gyud silang i-encourage nga magpabakuna gyud sila,” ni Ibones pa.
Sa pikas bahin, gisugdan na sa Talisay City ang paghatag og booster shots kontra Covid-19 sumala pa ni Mayor Gerald Anthony “Samsam” Gullas.
Matud pa ni Gullas nga mahimo nga makuha ang ikaduhang booster sa tulo ka vaccination sites sa mall sa barangay San Roque, Lawaan 1 ug sa Lagtang gym. Samtang padayon sab ang paghatag og bakuna sa menor de edad diha sa Talisay City College.
Ang ikaduhang booster alang pa kini sa mga senior citizen, frontliners ug sa mga tawo nga adunay gipamati sa ilang kalawasan base sa Department of Health (DOH).
Duna sab silay mga vaccinators nga mosuroy sa mga balay sa mga senior citizen nga wala pa gyud nabakunahan aron sila awhagon nga magpabakuna. Gabriel Bonjoc/IBM (BANATNEWS)
- Latest
