Sen. Imee Marcos nangu sa paghatag og ayuda sa mga Sugbuanon

CEBU, Philippines — Libuan ka mga Sugbuanon ang nakadawat og libreng utanon ug isda ingon man tabang pinansyal nga moabot sa P2 mil pinaagi sa opisina ni Senator Imee Marcos.

Si Marcos kinsa nibisita sa Sugbo niadtong miaging adlaw miingon nga kini maoy usa ka paagi aron pagtabang sa katawhan nonot sa nagsaka nga presyo sa mga nag-unang palaliton.

Maisip usab kini nga pasalamat sa mga Cebuanos nga misuporta sa iyang igsoon nga si President-elect Ferdinand “Bongbong” Marcos, Jr.

Sa lungsod  sa Consolacion ug sa siyudad sa Sugbo ang mga benepisyaryo nakadawat og  tag P2,000 gikan sa Department of Social Welfare and Development’s Assistance to Individuals in Crisis Situation ug ang maong kantidad gihatag pinaagi sa pakig alayon sa opisina ni Senador Marcos.

Ang senadora mao usab ang nangu sa pag apod apod sa hinabang alang sa mga mag-uuma og mangingisda sa lungsod sa Consolacion.

Dugay ra unta nga madawat ang maong ayuda sa mga mag uuma ug mangingisda apan napugngan kini gumikan sa election ban.

“Kana sila ron’g amoang gitabangan not all of them are true blooded Consolacionanon, naay daghan nianhi aron makatrabaho as much as possible humane accommodation atoang ihatag sa ilaha,” suma pa ni Mayor Alegado sa iyang statement.

Ang senador miadto usab sa barangay Tisa sa dakbayan sa Sugbo ingon man sa  barangay Mactan sa Lapu-Lapu City diin siya ang nangu sa ceremonial distribution sa laing laing klase sa mga utanon og isda ngadto sa mokabat sa 2,000  ka  beneficiaries.

Gidasig ni senador Marcos ang katawhan nga maghiusa sa pagtrabaho nga dili igsapayan ang politika.

Si Marcos mibisita usab sa Carbon Market niadtong Domingo diin siya misayaw uban sa mga Sinulog dancers ug nakighimamat sa mga vendors. (BANAT NEWS)