Rama ug del Mar nipasalig nga magtinabangay

CEBU, Philippines — Gipasalig sa mga napili nga kongresista sa duha ka distrito sa Siyudad sa Sugbo nga magtinabangay sa pagtrabaho alang sa kaayohan sa katawhan bisan pa nga dili sila susama og mga partido.

Kini maoy gibutyag kagahapon nila ni south district Congressman elect Eduardo Rama kinsa sakop sa Partido BARUG ug north district Congresswoman elect Rachel Marguerite “Cutie” del Mar nga sakop sa Bando Osmeña Pundok Kauswagan (BOPK).

Ipadayon sa maong mga kongresista ang paghingusog sa giduso nga balaodnon ni kanhi Cebu City North District Representative Raul del Mar nga House Bill 11 o ang pag -umol sa Mega Cebu Development Authority.

Sa maong pamaagi, madugangan usab ang funding gikan sa nasudnong kagamhanan alang sa mga dugang proyekto Sugbo.

Nagkanayon ang duha  ka kongresista nga importante kaayo ang mga konsultasyon ug koordinasyon aron makab-ot ang tinguha sa pipila ka mga programa.

Ug susama usab nila nga hingosgan ang programa kalabot sa edukasyon ug panglawas ilabi na nga nagsagobang ang katawhan sa pandemiya.

Atol sa OpenLine Media Forum sa MyTV kagahapon gipadayag ni Rama ug del Mar  nga ang mga tawo ang ilang gialagaran hinungdan nga makiangayon lang nga magkolaborasyon sila sa pipila ka mga programa.

Si del Mar sa iyang bahin, nitataw nga walay nakabangi  ang iyang nipanaw na ngadto sa laing kalibutan nga amahan ug maayo ang relasyon niini sa bisan kinsa nga mga tawo kon maghisgot og trabaho.

Ang maong hiyas nakat-onan ni del Mar ug iyaha kini nga ipadayon.

Bukas usab ang duha sa posibilidad nga pun-an og laing distrito ang Siyudad sa Sugbo.

Matud ni Rama ug del Mar nga ang maong pamaagi makahatag og dugang budget alang sa daghang mga programa sa siyudad.

Nahisgotan usab nila ang kabahin sa pagtinabangay sa pagsulbad sa problema sa baha sa siyudad. (BANAT NEWS)