CTU sa Liloan ug Borbon aprubado ni Duterte
CEBU, Philippines — Usa na kabalaod ang balaudnon nga nag establisar sa Cebu Technological University (CTU) Campuses lungsod sa Liloan ug sa Borbon.
Si kongresista Duke Frasco sa kinto distrito nipahibalo nga gipirmahan na ni Presidente Rodrigo Duterte ang balaudnon o House Bill No. 4740 ug HB No. 4741 nga karon usa na ka Republic Act No. 11751 niadtong Abril 27, 2022.
Ubos sa maong balaod ang duha ka CTU campus sa Liloan ug Borbon kinahanglang mohatag og “technical-vocational, undergraduate, and graduate courses within their areas of competency and specialization, pursuant to their mandate.”
“Not only will it provide savings in tuition and other fees to the residents, but more importantly, it will fulfill the State’s policy to provide access to quality tertiary education for all,” matud ni Frasco.
Si Senador Joel Villanueva nga maoy chairman sa Senate Committee on Higher, Technical and Vocational Education maoy ni sponsor sa maong balaudnon sa plenary niadtong Septiyembre 2021 ug naaprobahan niadtong Enero 17, 2022. Ang pundo alang niini kuhaon gikan sa annual General Appropriations Act (GAA).
Sa pikas bahin, gilusad na og balik ang mga vocational nga kurso sa Mandaue City College Technological Entrepreneurial Skills Training Center (MCCTEST) nga gipadagan ubos sa lokal nga kagamhanan.
Ang maong mga kurso nga naputol sa maong tulunghaan mga duha na ka tuig ang nakalabay tungod sa COVID-19 pandemic.
Naglakip sa mga kursong vocational nga gilusad ug ibalik na usab sa pagtanyag sa MCCTEST mao ang pagpanahi, food and meat processing, hilot wellness massage, automotive mechanic, dress making, cosmetology, computer system services ug uban pa.
Si Melinda Bihag nga maoy officer-in-charge sa maong tulunghaan miingon nga sayo sa school year 2020 ilang nahunong sa pagtanyag ang mga kurso vocational tungod usab sa COVID-19 pandemic.
Dugang pa ni Bihag nga ang maong mga kurso vocational lakip na sa ilang itanyag sa school year sa Septiyembre 2022. – /IBM (BANAT NEWS)
- Latest
