Tibuok sweldo ni Archival ihatag sa iyang scholars
CEBU, Philippines — Si Cebu City Councilor Nestor Archival niklaro nga dili maapektohan ang iyang pagpangalagad ngadto sa katawhan bisan og nalakip siya sa minority group.
Usa sa iyang tutokan mao ang sustainable development ug programa alang sa paghatag og trabaho.
Base sa report sa Cebu City Public Information Office giklaro ni Archival nga kanunay niya nga nahisgotan
panahon sa kampaniya ang proyekto nga adunay kalabotan sa patubig ug enerhiya.
Si Archival kinsa miyembro sa oposisyon nakakuha og 125,485 nga botos diin siya ang adunay labing taas nga boto sa north district niadtong Mayo 9, 2022 nga piniliay.
Ug siya ang kasamtangang minority floor leader sa konseho.
Matud ni Archival nga ang iyang tibuok sweldo iapod-apod niya ngadto sa mga tinun-an nga nalakip sa iyang personal nga scholarship program.
Upat ka sakop sa Bando Osmeña Pundok-Kauswagan (BOPK) ang nakadaog sa nilabay’ng eleksiyon isip konsehal sa siyudad nga gilangkuban nila ni Archival, Jose Abellanosa, Mary Ann de los Santos ug Joy Augustos Young. — /BDB (BANAT NEWS)
- Latest
