Problema sa informal settlers atimanon ni Piramide

CEBU, Philippines — Ang paghatag og lapad nga pagtagad sa mga suliran sa informal settlers maoy usa sa mga atimanon ni Atty. Aven Piramide kinsa nidagan pagka-kongresista sa north district sa Siyudad sa Sugbo.

Atol sa media forum kagahapon nakanayon si Piramide nga subo nga palandungon nga kanunay’ng mahilom ang mga programa alang sa informal settlers sa higayon nga mahuman na ang piniliay.

Matud ni Piramide nga kinahanglan usab nga magpatabang sa national government alang sa paghatag og kasulbaran sa mga suliran sa informal settlers.

Usa sa mga sestema sa pagtabang niini mao nga hatagan og dakong oportunidad ang informal settlers nga makabaton og kaugalingong yuta pinaagi sa mga barato nga luna nga nahaom sa ilang kapasidad.

Gipasigarbo ni Piramide ang iyang dedikasyon sa pagpangalagad.

Samtang ang kapikas niya nga si kanhi konsehal Carmen Piramide nibutyag nga usa usab sa plano sa iyang bana mao ang pagbutang og communication hub diha sa luwas nga dapit sa siyudad.

Tumong niini nga dili maputol ang instrumento sa komunikasyon sa higayon nga maigo sa bisan unsa nga katalagman ang Siyudad sa Sugbo.

Sama sa nahitabo dihang niigo ang bagyong Odette sa Sugbo naproblema niadtong higayona ang katawhan gumikan sa nawala nga signal.

Dugang ni Carmen nga kaabag siya kanunay sa iyang bana gumikan kay nakita niya nga aduna kini lapad nga kapasidad sa pagpangalagad. —BDB (BANAT NEWS)