Sweldo sa contact tracers gilaomang mahatag na

CEBU, Philippines — Gilaoman nga mahatag na sulod niining buwana ang nalangay nga sweldo sa kapin 200 ka contact tracers sa Emergency Operation Center Cebu City nga nagpaabot niini sukad pa sa buwan sa Enero.

Nasayran nga naaprobahn na sa Cebu City Council ang kapin sa P18 milyones nga gahin alang sa ilahang suholan.

Si Konsehal Joel Garganera, pangulo sa EOC nagkanayon nga gikinahanglan gihapon sa dakbayan ang contact tracers kini bisan og padayon nga niubos ang mga kaso sa COVID-19 sa siyudad.

Ug gumikan kay padayon nga nikunhod ang kaso sa COVID-19 sa Siyudad sa Sugbo ang ubang contact tracers gipatabang una sa vaccine rollout sa siyudad ngadto sa mga kabarangayan.

Subay sa maong hitabo si Konsehal Alvin Dizon nisugyot nga sundon ang tukmang proseso sa pag-hire og personnel sa city government aron dili malangay ang suholan niini.

Nasayran nga ang P18 milyones nga gahin sa suholan sa contact tracers molungtad lang hangtud sa buwan sa Hunyo.

Sa laing bahin, 56 na ka barangay sa Dakbayan sa Sugbo ang walay kaso sa COVID-19 kini base sa talaan sa EOC.

Nag-una nga Lima ka Barangay nga adunay taas nga kaso mao ang Guadalupe, lima; Labangon, upat; Sambag, upat; Mambaling, tulo; ug Apas, duha.

Si Garganera niawhag sa katawhan nga padayong mosunod sa mga health protocols aron magsige og kaubos ang kaso. —Rowena D. Capistrano/BDB (BANATNEWS)