PWD namasangil nga gipakauwawan sa opisyal sa barangay

CEBU, Philippines — Nireklamo ang usa ka babaye nga Person With Disability batok sa usa ka konsehal sa ilang barangay sa Tunghaan, Lungsod sa Minglanilla tungod kay giingong gipakauwawan siya sa maong opisyal.

Si Maricel Ramos, 33-anyos usa ka tindera og barbecue, taga Barangay Tunghaan sa nanisgutang lungsod aduna kini deperensiya sa iyang tuo nga tiil.

Si Ramos nipasangil nga niadtong Marso 27, 2022 sa alas 8:00 sa buntag diha sa ilang panimalay atubangan sa daghang tawo gisukmatan ug gihinginlan siya sa maong konsehal.

Sa wala pa ang maong hitabo, si Ramos nitambong sa rally sa grupo ni Francis Gerard “Jigger” Cañedo ug nagpahulagway ug gi-post diha sa Facebook.

Nagtuo si Ramos nga mao kadto ang gikalagotan sa maong opisyal sa ilang barangay.

Si Cañedo nagpapili pagka-mayor sa lungsod atbang nila Konsehal Rajive Enad ug ni Bise Mayor Loben Geonzon.

Gumikan sa iyang kauwaw ug kalagot nidangop siya sa kapolisan ug gipa-blotter ang maong hitabo. “Nagpakauwaw ka sa Barangay Tunghaan ug mga opisyales tangtangon ka sa PWD. Disable ka nga maru, baga kaayo ka og nawong nagpakugos ka ni Jigger ngano nag-post ka og my day sa Facebook”, saysay ni Ramos ngadto sa kapolisan.

Matud ni Ramos nga gipadalhan siya og summon sa barangay apan wala siya nitambong niini tungod kay alang niya wala siya’y kalapasan nga nahimo.

Si Ramos nibahad nga mosumbong sa maong hitabo ngadto sa buhatan sa Department of Interior and Local Government (DILG).

“Ilaha pa gyud ko nga gihadlok nga tangtangon ko sa benepisyaryo sa PWD kay wa kuno koy kaikog. Pwede diay na sir?,” pangutana ni Ramos.

Ang DILG hugot nga nipahimangno sa opisyales sa barangay nga di limokampaniya og kandidato tungod kay kalapasan kini sa Omnibus Election Code.

Gani nidasig pa sila nga mosumbong ngadto kanila kong adunay makit-an nga opisyales nga nihimo niini aron mapahamtangan og silot. Ang Banat News nisuway og kuha sa habig sa nahisgutang konsehal apan dili kini ma-contact. —BDB (BANATNEWS)