BOPK mophigayon og grand rally karong Sabado

CEBU, Philippines — Mopahigayon sa labing una nila nga grand rally ang mga kandidato sa Bando Osmeña Pundok-Kauswagan (BOPK) karong Sabado diha sa Cebu City Sports Center (CCSC).

Base sa post sa Facebook page ni kanhi Cebu City councilor Margot Osmeña kinsa nikandidato sa pagka-mayor sa siyudad, nagkanayon kini nga makauban nila si Senador Vicente Sotto III kinsa nikandidato isip bise presidente sa nasud ug pipila sa mga bitoon sa noontime show sa GMA-7 nga Eat Bulaga.

“Personal ko nga mangimbitar uban sa atong unang grand rally uban sa atong pinanggang Senator Tito Sotto. Kita-kita ta didto! Atong isyagit ang kabag-ohan ug kauswagan alang sa Dakbayan sa Sugbo!”, matud ni Osmeña.

Nanawagan si Osmeña ngadto sa ilang supporters nga kanunay gyud nga magsul-ob og face mask o motuman sa health protocols.

Samtang si Konsehal Joel Garganera, hepe sa Cebu City Emergency Operations Center nipadayag usab nga anaa na sila'y template sa maong klase nga kalihokan ilabi na nga usa kini ka open space.

Giawhag niya ang mga motambong niini nga magsul-ob kanunay og face mask.

Niadtong Marso 26, 2022 usa ka konsyerto ang gihimo diha sa CCSC nga gidagsaan sa mga tawo.

Giingong pribado ang organizer niini ug igo lang nila nga giimbitar si Cebu City Mayor Michael Rama.

Nitan-aw usab sa maong konsyerto ang ubang mga kaubanan ni Rama sa  Barug PDP-Laban.

Sayo pa, nihatag og komento ang Department of Health -7 sa maong kalihokan nga  ang dagkong panagtapok nakapabalaka tungod kay mahimo kini nga usa ka "super spreader".

Sa laing bahin, ang magpapili pagka-konsehal sa north district sa Cebu City nga si Gian Aznar gusto nga tutokan ang edukasyon ngadto na sa employment.

Matud ni Aznar nga bisan ug wala siya niagi isip barangay official apan maoy iyang tinguha ang makahatag og tabang ilabi na ngadto sa mga kabatan-onan isip usa usab ka batan-on.

Si Aznar nagkanayon nga 21 sila kabuok magpapili sa north district sa Cebu City apan malaumon siya nga mahatagan og kahigayon aron mapalapdan pa niya ang iyang ihatag nga tabang nga iyang nasugdan. —Rowena D. Capistrano/BDB (BANATNEWS)