Reklamo bahin sa cybercrime nagkadaghan

CEBU, Philippines — Mipahimangno ang Regional Anti-Cyber Crime Unit kon RACU-7 ngadto sa katawhan tungod sa naghitak nga pagpamiktima sa online portal lakip na niini ang identity theft ug hacking sa social media.

Matud pa ni Police Staff Sergeant Ronelle Jay Ocariza, assistant investigator sa Anti-Cybercrime Unit Central Visayas, nga kadaghanan sa ilang nadawat nga reklamo mao ang ang cyber libel, online scam ug identity theft.

Gidasig niini ang mga nabiktima sa pagtahu sa ilang buhatan ug dalhon ang ilang mga gadgets nga kanunay gamiton nila alang sa pag log-in aron mapangitaan nila ug pamaagi nga ma retrieve ang account.

Gi-awhag usab ang mga nabiktima nga nakapadala ug kwarta nga moadto sa ilang buhatan og dalhon ang mga resibo aron ilang himoan og imbestigasyon.

Gitug-an ni Ocariza, 30 ngadto sa 50 ka mga reklamo ang ilang nadawat nga naglangkob sa hacking, identity theft ug uban pa.

Subay niini ang RACU-7 nag-awhag sa publiko nga mas maayo dili motubay sa mga transaksyon diha sa social media. Rowena D. Capistrano/MEL

Mga esnatser sa Talisay nisiaw,  gitutokan karon sa kapolisan

Gitutokan karon sa kapulisan sa Dakbayan sa Talisay ang mga lokal nga kawatan ug esnatser nga wala pa gihapon mangadakpi o mahipos ug padayong namiktima sa publiko.

Si Police Lt. Col. Randy Caballes, hepe sa kapulisan sa Talisay nibutyag nga duha ka mga kawatan nga nagsakay og motorsiklo ang ilang gigukod.

Gani ang panghitabo nakuha pa sa video sa mobile group.

Nakasibat man ang nagmaneho sa motorsiklo apan nasikop ang iyang angkas nga si Jose Aniñon nga nakuhaan pa ang .38 nga revolver.

Sunod-sunod sab ang ilang dakop sa mga tawo nga nalambigit sa ginadiling drugas apan nahibaw-an sab nga nalambigit sab diay sila sa snatching ug pagpangawat.

Matud pa ni Caballes nga ilang gimonitor karon ang uban pa nga kawatan nga padayon nga gawasnon.

Girekomendar nila sa mga barangay nga pasug-an ang ilang mga kadalanan panahon sa kagabhion.— IBM (BANATNEWS)