Balt Quinain gihandum, 40 ka tuig ang milabay

CEBU, Philippines — Usa siya sa labing bangiitan nga mga Sugbuanong periyodista sa iyang panahon, usa ka inila ug tinamod nga lider sa newsroom ug labaw sa tanan, usa siya sa mga haligi nga responsable pagbuhi og balik sa labing karaan nga pamantalaan sa Sugbo, ang The Freeman nga igsuong pamantalaan sa Banat News.           

Adbokasiya ni Balt Quinain ang paghatag sa mga Sugbuanon og tinuod ug hustong impormasyon.

Nagtuo siya nga ang impormasyon usa ka gahum. Tungod niini dali kaayo siya nga nagkombinsir aron tabangan ang suod niya’ng higala nga si Jose “Dodong” Gullas pagbanhaw sa The Freeman niadtong tuig 1965 kauban si Juanito Jabat diin ilang gibansagan ang ilang kaugalingon nga “The Three Musketeers”.

Nahimamat ni Dodong Gullas si Quinain dihang ang nauwahi editor pa sa Visayanian, ang school paper sa University of the Visayas (UV) nga gipanag-iya sa pamilyang Gullas.

Sukad niadto, nahimo siyang usa sa mga sinaligang higala ni Dodong diin ilang gisaw-an ang susamang sentimento ug panglantaw sa periyodismo ug kagawasan sa prensa.

Si Quinain maoy naghulma sa tanang pundasyon aron ang pamantalaan makasugod og publikasyon, siya usab maoy nagtagik sa mga palisiya sa editorial, mga lagda nga angay’ng sundon sa usa ka tigbalita ug ingon man pagpang-recuit og reporters ug staff aron makompleto ang organisasyon.

Iyang gitugyan ang iyang kinabuhi sa periyodismo diin nasulod sa iyang alimpatakan nga ang kinabuhi mas mabungahon kon igahin kini sulod sa newsroom imbes nga sa courtroom.

Desisyon kini nga iyang giluwatan dihang wala siya mosubay og karera isip usa ka abogado bisan og nakahuman ug migwadwar siya sa law school sa UV niadtong tuig 1963.

Ang newsroom nahimo niyang ikaduhang panimalay ug nagbaton siya og daghang responsibilidad diin gawas nga nagbarog nga haligi sa publikasyon, usa usab siya ka reporter, kolumnista ug editor.

Apan human sa mabulokon ug dalaygon niyang 17 ka tuig nga pagpuyo isip usa ka periyodista nahiagom siya sa stroke ug dayon namatay niadtong Marso 28, 1982 sa edad nga 46-anyos.

Gibiyaan ni Quinain ang iyang kapikas nga si Rose Pioquinto ug tulo ka anak nga lalaki nga sila si Balt Jr., Ted ug Bobby.

Karon, sa paghandum sa ika-40 nga anibersaryo sa iyang pagtaliwan ngadto sa laing kalibutan, ang iyang mga higala, pamilya ug kauban sa buhat maghandum sa kanunay ni Balt isip usa ka tawo nga nakahatag og inspirasyon ug nakatandog sa kinabuhi sa uban pinaagi sa pag-ambahan ngadto sa usa ka bililhong tinguha nga mao ang pagsabwag sa kamatuoran, patas ug hustong balita sa katilingban.

Nagbilin usab siya og malungtaron nga legasiya nga mao ang The Freeman, ang pamantalaan nga gitabangan niya og tukod ug mahimong tinubdan sa impormasyon ngadto sa mga Sugbuanon hangtud karon ug sa umaabot pang mga katuigan. (BDB) (BANATNEWS)