7 ka manok nga dunay sakit nasakmit sa Bogo
CEBU, Philippines — Pito ka manok nga adunay sakit ang nasakmit sa City Veterinary Office sa siyudad sa Bogo gikan sa Luzon.
Ang maong mga manok walay igong dokumento sa pagbyahe padulong didto sa Bogo hinungdan sa pagsakmit sa City Veterinary Office Port Staff niadtong Marso 20 sa gabii.
“Sa pag-inspect sa mga manok nakitaan kini ug sakit, ang nakumpiskar nga mga manok gidispatsar pinaagi sa pagsunog ug paglubong” segun sa anunsyo sa facebook page sa Bogo City government.
Ang pagsakmit sa maong mga manok nahisubay sa Executive Order ni gobernador Gwendolyn Garcia nga nag ban sa tanang poultry ug wild birds lakip na ang day old chicks, semen, fresh eggs, embryonated eggs, manure ug ubang byproducts sulod sa 45 ka adlaw tungod sa hulga sa Bird Flu.
Pipila ka mga probinsya didto sa Luzon sama sa Pampanga ug Bulacan ang aduna nay kompirmadong kaso sa bird flu. —MEL (BANATNEWS)
- Latest
