Kagamhanan sa Oslob nanghinaot nga dagsaan og turista ilang lugar
CEBU, Philippines — Ang kagamhanan sa Lungsod sa Oslob naglaom nga dagsaan og mga turista karong sunod buwan ang ilang lugar matud ni Mayor Jose Tumulak Jr.
Gibutyag ni Tumulak nga sa pagkakaron gibisita na og mga turista ang ilang lugar ilabi na sa weekend.
Nasugod kini human ang probinsiya wala nay daghang rekisitos alang sa mga turista.
Apan giklaro ni Tumulak nga ang resort ug restaurant padayon sa pag-implementar sa health protocols ilabi na sa ilang mga kliyente.
Nalipay si Tumulak nga nabalik na og hinay-hinay ang ilang ekonomiya diin mao kini ang gisaligan sa katawhan.
“Nagtuo ta nga mga restaurant ra ang nagproblema kay wa na ang turista pero nakita sab nga nikonektar kini ngadto sa mga drayber sa traysikol ug ginagmay nga negosyante”, dugang ni Tumulak.
Sa laing bahin, ang kapolisan sa Dakbayan sa Sugbo makig-alayon na karon sa Tourism Office aron sayran kung unsa na nga mga tourism spot ang nagbukas na pagbalik.
Kini ang gibutyag ni Police Lieutenant Colonel Wilbert Parilla, deputy director for operation sa Cebu City Police Office.
Matud ni Parilla nga gibalik na nila ang mga tourist personnel sa ilang police unit human kini sila gipang-deploy atol sa COVID-19 pandemic.
Makig-alayon sila sa Tourism Office aron sayran ang mga nagbalik na pag-abli nga tourism destination sa siyudad ug mahatagan og police security ilabi na nga dagsaan kini ug daghang tawo matag weekend.
Dugang ni Pariila nga sa pagkakaron aduna na sila’y mga deployment nga mga tourist police sa pipila ka mga lugar nga naglangkub sa Plaza Independencia, Port San Pedro, Magellan’s Cross, malls ug uban pa. Rowena D. Capistrano/BDB (BANATNEWS)
- Latest
