Siquijor modawat na’g turista
CEBU, Philippines — Modawat na karon ang Probinsya sa Siquijor og mga turista nga fully vaccinated na batok COVID-19, karon nga ang lalawigan gipaubos na sa Alert Level 1. Nagpasabot nga dili na kinahanglan nga mopakita og negative nga RT-PCR test result ang mga moadto sa Siquijor kon sila nakakompleto na sa bakuna ug ang ipakita lang mao ang proof of vaccination sama sa vaccination card, ID ug booking confirmation sa mga accredited nga mga establisamento sa maong probinsya.
Dili na sab kinahanglan ipaubos sa kwarantina ang mga travelers nga bakunado nga mosulod sa Siquijor. Kini base sa Executive Order No. 2022 – 005 nga giluwatan ni Governor Zaldy Villa niadtong Marso 1.
Sa 13 ka pahina nga EO ang mga mag puyo sa Siquijor nga adunay mga kabanay o kaila kinahanglan lang og confirmation note sa ilang kapuy-an diin nakalatid ang address kon asa magpuyo ang bisita.
Ang mga bisita kinahanglan nga mo rehistro sa Safe, Swift and Smart travel pass (S-Pass) sa dili pa ang ilang pag abot didto sa probinsya.
“However, tourists who cannot register to S-PASS shall be allowed entry provided they can present to the coastguard on duty at the port of origin the above-stated requirements,” sumala sa EO ni Villa.
Ang mga bisita ipaubos kini sa health screening o “triage” kon diin didto susihon kon nikatuman ba kini sa rekisitos nga gitakda sa LGU-Siquijor.
Sa mga unvaccinated inbound travelers, kinahanglan magpakita gihapon og negative RT-PCR test result nga kuha sulod sa 72 ka oras, valid ID ug approved S-pass.
Ang mga bata nga nag edad og 11 anyos paubos nga dili pa bakunado way labot sa maong polisiya kon sila kuyog sa fully vaccinated nga adult. MEL (BANATNEWS)
- Latest
