Balay sa biktima sa bagyong Odette Gipabarog og balik sa Cebu City BFP

CEBU, Philippines — Dili lang pagresponde sa sunog ang mahimong buhaton sa kabomberohan sa siyudad sa Sugbo apan lakip na sab ang pagtabang niadtong mga kabus nga naglisod gyud sa kinabuhi.

Ang Cebu City Fire Office migamit ang ilahang pundo nga alang unta sa ilahang Christmas Party niadtong buwan sa Disyembre aron tabangan ang usa ka pamilya sa Barangay Agsungot nga makatukod og balik sa ilahang panimalay nga nagusbat sa bagyong Odette.

Matod sa tigpamaba sa Cebu City Fire Office Senior Fire Officer 2 Wendel Villanueva niadto pa untang Disyembre 23, 2021 ang ilahang Christmas Party apan wala kini madayon tungod sa maong bagyo nga miigo Disyembre 16.

Nahuna-hunaan nalang sa kabomberohan ingon man sa ilahang City Director Chief Inspector Josephus Alburo nga gamiton ang pundo pagtabang sa nanginahanglan.

Nauyunan nila nga magpili usa ka beneficiary aron makatukod sa ilahang panimalay nga naguba sa bagyo diha sa Barangay Agsungot.

Ang qualifications nga gilang gitan-aw sa pagpangita og beneficiary mao kadtong wala gyu’y kapasidad nga makapatukod og balik sa ilang panimalay.

Ang napulo ka fire sub-stations sa Cebu City Fire Office nga mao ang Parian, Pardo, Mabolo, Lahug, Cebu Business Park, Talamban, Labangon, Guadalupe, San Nicolas, ug Pahina gipa-submit og pilionong benepisaryo diha sa ilang hurisdiksyon.

“Guba gyud kaayo ang ilahang balay, wasak gyud kaayo so mao toy napilian kay ang tanang sub-stations gipapangita gyud namo, mao gyud toy naswertehan so among gitukuran siya mao na ugma among gi-turnover na”, sigon ni SFO2 Villanueva.

Gisugdan pagtukod ang balay sa unang semana sa buwan sa Pebrero ug nahuman nila sa katapusang bahin sa maong buwan. Gibana-bana nga moabot sa dul-an P100,000 ang budget niini.  Karong adlawa, Marso 6, 2022 i-turnover ang maong balay ngadto sa beneficiary.

“Actually ang target last week of February galing lang daghan og kakulian, daghang activities gyud sa Fir Prevention Month mao ng nadelatar na siya, pero nahuman na siya unya standby na for turnover,” ni Villanueva pa. (BANAT NEWS)