Bikil sa sud sa grupo ni Rama hiluton
CEBU, Philippines — Paninguhaon ni Cebu City Mayor Michael Rama nga sulbaron kining panagbingkil sa mga miyembro sa ilang grupo partikular ang bikil tali nila ni kanhi Konsehal Pastor Alcover Jr. ug kanhi Cebu City Administrator ug karon Chairman sa Partido Panaghiusa Atty. Floro Casas Jr.
Ang Partido Panaghiusa gipangulohan ni Casas maoy Chairman ug ang Partido Barug nga gipangulohan ni Rama kun diin miyembro si Alcover nag-alyansa para sa umaabot nga Mayo 9, 2022 National ug Local Elections.
Apan hayan maapektuhan ang relasyon sa ilang grupo human nga si Alcover giaresto tungod sa kasong cyber libel nga gipasaka kaniadto ni Casas.
Nakuratan si Alcover nganong nalutsan kini warrant of arrest nga wala man gyud siya nakadawat og subpoena aron tubagon ang mga kasong gipasangil kaniya.
Usa pa, nagtuo si Alcover nga wala nay problema kay naghusay na sila kaniadto ni Casas. “As far as I’m concern we will be sitting it down and wishing all is well that ends well and I wish that matter hopefully, optimistically can be thresh out in the days to come,” sigon ni Rama.
Si Alcover mibutyag nga tungod sa nahitabo makaapektar kini sa kalig-on sa ilang alyansa sa grupo ni Casas kay sama ra og nag-unay sila.
Apan si Rama malaumon nga dili maapektahan ang ilang grupo ug miingon nga dunay solusyon para niini ug dili mamahimong problema sa umaabot.
Si Alcover nakagawas ra hinoon niadtong Biyernes human nakapiyansa og P20,000. (BANAT NEWS)
- Latest
