Billones niawhag alang sa hugot nga pag-ampo

CEBU, Philippines — Si Auxiliary Bishop Midyphil Billones sa Archdiocese of Cebu ug kasamtangan nga team moderator sa National Shrine of St. Joseph Mandaue City niawhag ug hugot nga pag-ampo alang sa kagubot nga nasinati karon sa mga nasud sa Ukraine ug Russia.

Matud ni Billones nga ang kasakit sa atong mga kaigsuonan, kasakit usab kini sa tibuok kalibutan hinungdan nga moapelar siya sa katawhan ug pag-ampo.

Si Billones nagkanayon nga dako ang iyang pagtuo nga pinaagi sa pag-ampo ang kalinaw mo-overcome sa gubat ug panagbangi samtang ang katawhan mobalik ngadto sa diyalogo aron makakita og solusyon alang sa kalinaw tungod kay ang gibati nga kasakit sa uban ato usab kini nga masinati.

Ug kong usahon ang kasing-kasing ug intention aron lihokon sa malinawon nga paagi ang wala pagsinabtanay siya nagatuo nga adunay paglaom dili lang sa nasud nga naglambgit sa kagubot apan sa tibuok kalibutan. Dugang ni Billones nga kita sa Pilipinas apektado usab sa maong kagubot sa maong mga nasud hinungdan nga kinahanglan kaayo ang hugot nga pag-ampo para sa kalinaw ug panag-uyon. (Rowena D. Capistrano/BDB)

Rama dili moapelar pagpakunhod sa alert level sa Cebu City

Si Cebu City Mayor Michael Rama walay plano nga moapelar ngadto sa nasudnong kagamhanan alang sa pagpaubos sa alert level status sa Siyudad sa Sugbo.

Base sa report sa Cebu City Public Information Office gipadayag kini ni Rama atol sa convergence sa multi-sectoral leaders sa niaging gabii. Nasayran nga sugod kagahapon hangtud sa Marso 15, 2022 magpabilin nga alert level 2 ang siyudad.

Nanawagan hinuon si Rama sa katawhan nga magpabilin nga magmatngon ug motuman sa health protocols.

Si Rama niisyu sa Executive Order No. 163 kun “Oplan Kagawasan” atol sa kasaulogan sa 85th charter day sa siyudad diin giwagtang na ang curfew alang sa mga 18- anyos pataas ug pagbukas na sa tanang establisamento.

Sa laing bahin, si Konsehal Joel Garganera, pangulo sa Emergency Operations Center Cebu City nagkanayon nga 23 ka barangay sa Siyudad sa Sugbo ang walay COVID-19 transmission sulod sa 14 ka adlaw ug ang positivity rate sa siyudad anaa lang sa 2.96 porsyento ug nasulod kini sa 5 porsyento sa World Health Organization threshold ug gawas niini ang active cases sa siyudad anaa na lang sa 230. Matud ni Garganera nga ang padayong pagpamakuna usa sa nakatampo sa pakunhod sa kaso sa COVID-19.  Decemay P. Padilla/BDB (BANATNEWS)