Cebu City nag-una sa pagpamakuna tibuok nasud
CEBU, Philippines — Ang Cebu City mao lamang ang bugtong local government unit sa tanang gitawag nga highly urbanized cities and provinces sa Central Visayas nga nakab-ot ang vaccination target bisan wala pa mahuman ang 3rd National Vaccination Days (NVD) kagahapong adlawa, Pebrero 18, 2022.
Ang siyudad mao sab karon ang nag-una sa pediatric vaccination rollout base sa data gikan sa National Vaccination Operations Center (NVOC).
Kini human ang Cebu City nakabakuna og 50,057 sa 50,036 target doses niini o 100.04 percent gikan Pebrero 10 hangtud 17, walay labot sa Pebrero 13 kay gipapahuway ang mga health workers.
Pinaagi sa average nga 6,257 doses kada adlaw nga ilang nahatag kun sumahon niabot na og 56,314 doses ang ilang nahatag sa pagtapos sa NVD nga sobra ra sa target nga 56 mil nga gipangayo sa NVOC.
Samtang ang Cebu Province nakaabot og 77.42 percent sa target human 113,339 doses sa 146,404 target doses sa unang walo ka adlaw ang ilang nahatag. Ang Mandaue City nakaabot sab og 68.93 percent human nakahatag sila og 17,469 doses samtang ang Lapu-Lapu City naka 49.63 percent sa ilang 13,629 doses nga nahatag.
Sa laing bahin, ang Bohol naka 62.41 percent sa target nilang 33,310 doses, Negros Oriental 39.90 percent sa ilang 25,946 doses nga nahatag ug ang Siquijor 38.96 percent sa 2,048 doses nga ilang nahatag sa maong mga adlaw.
Ang tigpamaba sa Visayas Vaccination Operation Center ug kasamtangan nga chief Pathologist sa Department of Health Dr. Mary Jean Loreche mihangop sa maong kalamboan ilabi na nga pipila pa lang ka adlaw sukad sila nagsugod sa pagpamakuna.
Gitug-an ni Loreche, ang Cebu City ug Liloan nagsugod pa niadtong adlaw nga Miyerkules. Si Loreche, padayon nidasig sa mga ginikanan sa pagdala sa ilang mga anak sa mga vaccination center aron kini mabakunahan batok sa Covid-19.
Apan sa labing uwahing report gikan sa Lapu-Lapu City nakabakuna na ang siyudad og 1,100 ka mga bata.
Si Atty. James Sayson nga maoy vaccine czar sa maong dakbayan miingon nga duna silay 3,000 ka mga doses sa reformulated Pfizer COVID-19 vaccine gikan sa Department of Health (DOH) para sa maong mga edad.— Rowena Capistrano, Romeo Limpangog/IBM (BANATNEWS)
- Latest
