Daluz: Laing duha ka distrito planong tukoron

CEBU, Philippines — Gibutyag sa presidente sa Partido Panghiusa Atty. Joey Daluz nga ilang gitinguha nga dugangan og laing duha ka distrito ang Siyudad sa Sugbo.

Mao kini ang ilang nasabotan kon modaog ang ilang mga kandidato pagka-kongresista sa north ug south district nga sila si Konsehal Niña Mabatid ug Konsehal Eduardo Rama.

Matud pa ni Daluz nga dako og matabang kon mahimo na nga upat ang mga distrito sa siyudad gumikan kay mas daghan na ang mahimong tinubdan sa pundo nga maoy gamiton sa  daghang proyekto alang sa katawhan.

Ug kon ang usa ka lugar adunay 250,000 nga populasyon kwalipikado kini nga mahimong usa ka distrito. Giingong ang Siyudad sa Sugbo haom niini tungod kay aduna kini minilyon ka residente.

"Kun daghan ang mga kongresista, mas daghan pod ang mga proyekto nga mahatag ngadto sa siyudad”, matud ni Daluz.

Gani andam usab mosuporta sa maong tinguha ang STL Party List nga maoy gi-endosar sa Partido Panaghiusa.

Ang nominado sa maong party-list mao ang kanhi administrador sa Cebu City Medical Center nga si Yvonne Cania.

"Kung makadaog ang STL lima na ka kongresista ang maghatag og kaayohan sa siyudad. Busa plano gyud nato nga himuong upat ang distrito sa siyudad’, dugang ni Daluz.

Nasayran nga adunay alyansa ang Partido Panaghiusa ngadto sa Partido Barug ni Mayor Michael Rama ug sa Kugi Uswag Sugbo (Kusug) ni Konsehal Raymond Garcia kinsa nidagan pagka-bise mayor.

Apan lahi nga party-list ang gi-endorsar sa Barug nga mao ang Marino Party-list. —BDB (BANATNEWS)