Casas: Mohilak sa tago si Labella

CEBU, Philippines — Mga dili malimtang buhat ni Cebu City Mayor Edgardo Labella ang gipadayag sa mga tawo nga mihatag sa ilang eulogy atol sa necrological service sa katapusang adlaw sa haya sa mayor kagahapon sa wala pa kini gihatod sa katapusang pahulayan sa Golden Haven Memorial Park sa Barangay Binaliw.

Unang mihatag sa iyang eulogy si Vice Mayor Donaldo “Dondon” Hontiveros dayon si Mayor Michael Rama kinsa subling miklaro nga dili kini ang gusto nilang mahitabo sa pagpangulo nila sa siyudad sa Sugbo.

Ang katapusang mihatag sa iyahang eulogy mao ang usa sa sinaligan ni Labella nga si City Administrator Atty. Floro Casas Jr.

Si Casas misaysay nga daghan kaayo sila og naagian ni  Labella nga hantod sa hantod dili niya malimtan. Samtang nagpadayon sa pagsaysay sa mga kasinatian wala kapugni ni Casas ang pagbakho. Ilabi na sa parte nga dihang gipatawag siya sa mayor adtong bulan sa Hunyo sa miaging tuig ug gipahibawo siya nga duna kini sakit ug mihangyo kaniya nga dili isaba sa uban kay dili niya buot kaluy-an sa mga tawo kay gusto niining tutokan ang panerbisyo alang sa kaayohan sa siyudad.  Matud ni Casas bisan masakiton ug dunay pandemiya sa Covid-19m wala mohunong ang namatay nga mayor og trabaho kini bisan og gibiay-biayan na siya ug gisaway ilabi na diha sa social media. Diha lang kini nagsugod og leave dihang nagsulod-gawas na kini sa tambalanan.

Si Casas miingon nga nakita gyud niyang apektado si Labella sa mga isyung gibato kaniya kay dunay higayon nga nakita niya kining mihilak sa tago.

Karon nga mipanaw si Labella naguol si Casas kay dili na madungog sa mayor ang mga pagdayeg gikan sa mga tawo.

Matud pang Casas, ang uban sa mga midayeg ug misaludo sa dedikasyon sa trabaho ni Labella karong patay na kini, mao ra sab ang kaniadto nangdaot kaniya, ang uban higala pa gyud sa mayor.

Ang mga kaubanan sa buhat, mga kawani ug suod nga higala ni Labella wala makapugong sa ilang luha ilabi na dihang gipakita ang video pahinungod kaniya.

Human sa necrological rites gidala ang lungon ni Labella sa Cebu Metropolitan Cathedral alang sa requiem mass nga gipangulohan ni Cebu Archbishop Jose Palma.

Sa wali ni Palma gihulagway niya si Labella nga usa ka maayong lider ilabi na panahon sa pandemya kay wala kini kukahadlok pagserbisyo bisan masakiton na kini.

Gikan didto, ang funeral convoy nisubay sa P. Gomez Street, D. Jakosalem Street, Colon Street, Osmeña Boulevard, Fuente Osmeña Circle, N. Escario Street, Archbishop Reyes Avenue, Governor M. Cuenco Avenue, Talamban Road, Miramonte Riverdale Road dayon Golden Haven Memorial Park sa Barangay Talamban kun diin siya ilubong. Ang anak ni Labella nga si Jaypee nagpasalamat sa katawhan sa suporta nga gihatag nila ngadto sa iyahang amahan.— Rowena Capistrano/IBM (BANATNEWS)