Robredo maninguhang suportahan pagusab sa mga Sugboanon sa 2022

CEBU, Philippines — Gihangop ni Bise Presidente ug presidential aspirant Leni Robredo ang gihulagway niyang ‘non-traditional’ nga suporta sa mga Sugboanon sa iyaha sukad pa niadtong 2016 elections nga kun diin siya nakadaog dinhi.

“Actually, sobrang overwhelming. From the time we got out of the plane this morning, hindi ko pa naranasan ito from before. Iyong reception na natanggap ko ngayon, sobrang layo from the one in 2016,” ni Robredo pa sa press conference human sa pagbendisyon sa Leni-Kiko headquarters sa Sampaguita Suites sa Mango Avenue, Cebu City.

Matud pang Robredo lahi kaayo sa iyang kampanya sa miaging 2016 elections ang karon. Kay kaniadto, silang mga kandidato maoy mi-organisar, nagprinta sa mga materyales, nagandam sa mga kalihokan ug uban pa.

Apan nabali na karon. Kay pagabot palang niya dinhi daghan ng gihimo ang ilang supporters para kanila. ”So kahit iba siya in the sense na we’re not in the admin anymore, we don’t have the machinery, pero the passion of the volunteers more than make up for what we don’t have now,” matud niya.

Kauban ni Robredo ang iyang runningmate nga si Senador Francis “Kiko”  Pangilinan ug senatoriables nga silang Chel Diokno ug Teddy Baguilat ug representante ni Senador Leila de Lima nga si Alex Lacson.

Para kang Robredo, importante kaayo ang Sugbu tungod sa dako kini og natabang kaniya niadtong 2016 kay kun wala pa ang mga Sugboanon mapildi unta kini.

”So—but having said that, I’m not entitled to anything. I still have to work hard para makuha ko ulit the trust and the support given to me in 2016,” dugang pa niya.

Si Robredo miingon nga sukad sa iyang paglingkod daghan na siyang gihimong mga nagkalain-laing proyekto sa Cebu City ug uban pang LGUs sa probinsya sama sa San Remigio, Tuburan, Tabuelan, Bago, San Francisco, Carcar, Consolacion, Naga ug Dalaguete.

“Marami kaming ginagawa lalo na noong nag-pandemic. Kasi when the pandemic happened, we did Bayanihan Sugbuanon in Cebu. Nag-shuttle services kami for frontliners, dorms for frontliners. We had a ferry service from Mactan to Olango. We did locally-produced PPE sets with communities. Relief goods. Nag-download din kami ng pera sa ibang mga ospital dito for medical assistance. So tuloy-tuloy naman,” dugang pa niya.

Kagahapong adlawa, gi-turnover ni Robredo ang training funds alang sa Selma Crushers,  Nice J. ug Bantay Banay Volunteers nga kapartner sa ilang sustainable livelihood training program.

Nakigkita sab si Robredo kang Cebu Archbishop Jose Palma kagahapong adlawa.

Nagpagamit ang simbahan?

Apan ang kalihokan sa grupo ni Robredo nga gihimo diha sa SPFY Covered Court sulod sa Archbishop Palace gisaway sa pipila ka mga netizens.

Gidudahan nila ang Simbahan nga adto pusta ni Robredo kay matud pa dili unta sila manginlabot sa politikanhong kalihokan.

Apan usa sa mga Office Staff sa San Pedro Calungsod Chapel nitug-an sa Banat News nga giabangan sa mga organizers ang venue alang sa mga kalihukan para sa mga kabus.

Giklaro niini nga ang maong venue mahimong abangan ni bisan kinsa kansang kalihokan para sa buhat sa kalooy ug para sa mga kabus.

Samtang si Msgr. Joseph Tan, ang tigpamaba sa Archdiocese of Cebu wala sab makahatag og kompletong detalye bahin niini.

Apan kini nitug-an nga bisan kinsa pa, politiko man o dili, basta ang kalihokan alang sa mga buhat sa kalooy o proyekto para sa mga kabus mahimo rang mogamit sa maong lugar. Apan iyang gipasidan-an ang mga politiko nga dili mahimong gamiton ang kalihokan diha sa venue aron mangampanya, o magendorsar sa ilang kandidatura o kaha maghimo ug political rally aron sila botaran.

Gawas sa pakigkita ni Robredo kang Cebu Archbishop Jose Palma, nakigkita sab siya sa mga sectoral groups nga naghimo sa ilang kalihokan sulod sa covered court sa Palasyo ug giingong nipadangat kini ngadto kanila sa iyang mga programa. (BANAT NEWS)