CCCAT ipabilin ang subsob nga pag-roving

CEBU, Philippines — Bisan pa nga ubos na sa alert level 2 ang Siyudad sa Sugbo ipabilin gihapon sa kagamhanan sa siyudad ang subsob nga pag-roving sa

Cebu City COVID Action Team (CCCAT). Ang CCCAT mosulod kini diha sa mga suok-suok nga lugar aron mo- edukar sa mga tawo sa importansiya sa pagsunod sa health protocols.

Si Konsehal Phillip Zafra kinsa usa sa mga naghupot sa action team nagkanayon nga dili gihapon angayang mokompiyansa bisan og niubos na ang quarantine status sa siyudad.

Kauban sa CCCAT sa pipila nila ka operasyon ang kapolisan, barangay opisyal, tanod , Prevention Restoration Order Beautification and Enhancement (PROBE) team , Task Force Kasaligan , Cebu City

Transportation Office ug  Cebu City's Environmental and Sanitation Team (CESET). "Kinahanglan nga duna tay disiplina gyud. Dili ta anang magtambay-tambay sa gawas”, matud ni Zafra.

Sa pagsunod sa health protocols makahatag kini og dakong kontribusyon alang sa padayon nga pagmenos sa kaso sa COVID-19 sa Dakbayan sa Sugbo. Gikataho nga nagkaubos na ang positivity rate sa kaso sa COVID-19 sa siyudad.

Sayo pa, si Cebu City Acting Mayor Michael Rama niawhag sa komunidad nga mohimo usab og mga inisiyatibo alang sa paghatag og kooperasyon sa kampaniya batok sa COVID-19.

Matud ni Rama nga mas labing maayo nga mogawas lang sa panimalay kon adunay importanteng buhaton.

Ang kagamhanan sa siyudad padayon kini sa ilang kampaniya sa Oplan Puyo. (BANAT NEWS)