Abandonadong budyong nasakmit

CEBU, Philippines — Dulan usa ka libong Budyong ang gisakmit sa Maritime Law Enforcement Team, Bantay Dagat ug Municipal Agriculturist-Fisheries Office sa Bantayan diha sa Sitio Tabunok, Barangay Lipayran sa maong lungsod niadtong Huwebes.

Ang budyong gikonsiderar kini nga endangered species. Nakitan kini nga gisulod sa 48 ka sako ug giabandona sa baybayon sa maong isla. Gibana-bana nga mokantidad kini og 365 mil ka pesos. Ang budyong nga usa sa labing talagsaon nga sea shells dili mahimo nga hiposon, ibaligya ug i-transport subay sa Republic Act (RA) 8550 kon Philippine Fisheries Code.

Kini nagkanayon nga ang pagkuha sa mga rare, threatened, o endangered species mahimong mamultahan gikan sa P500 mil ngadto na sa P 5 milyones kun makonbikto sa korte.

Ubos sa maong balaod, aduna usab kini’y  silot nga pagkabilanggo gikan sa 12 ngadto na sa 20 ka tuig.

Ang mga nasakmit nga budyong  naa karon sa buhatan sa Maritime Police ug gikatakda nga dalhon kini sa buhatan sa Bureau of Fisheries and Aquatic Resources  Central Visayas sa Dakbayan sa Sugbo.

Si Mayor Arthur Despi miingon nga magsilbi kining warning ngadto sa mga tawong naghimo nalambigit sa ilegal nga pagpanagat. (BANAT NEWS)