Mga establisamento gipangayuan og pandemic contingency plan
CEBU, Philippines — Gimanduan ang tanang establisamento dinhi sa Siyudad sa Sugbo nga gitugotang maka-operate nga mosumitir na gyud og pandemic contingency ug action plan ngadto sa buhatan sa Cebu City Emergency Operations (EOC) ug Business Permits and Licensing Office (BPLO).
Mohimo og ebalwasyon ang EOC sa giduso nga contingency plan ug kun makapasar kini, isyuhan dayon ang establisamento og Certificate of Approval.
Nasayran nga ang Siyudad sa Sugbo ubos na karon sa Alert Level 2.
Base sa bag-ong direktiba nga giisyu kagahapon ni Acting Mayor Michael Rama, ang mapakyas sa pagkuha sa maong certificate mag-atubang og silot ug usa na niini ang posibleng suspensyon sa operasyon sa establisamento o ba kaha ang pagpasira niini.
Kinahanglan usab nga ibutang o i-attach sa contingency plan ang Business permit, contact person/number sa tag-iya, sukod sa area (indoor ug out door), surveillance system, vaccination status sa workers, ug uban pa.
Ang matag establisamento adunay Health, Safety, and Protocol Compliance Officer.
Nasayran nga importante kaayo ang pag-umol og safety officer aron duna gyuy maka-focus sa pagmonitor sa implementasyon sa minimum health protocols.
Gitahasan usab ang EOC ug Cebu City Disaster Risk Reduction and Management Office (CCDRRMO) nga mogama og template o standard format sa pandemic contingency and action plan nga maoy guide sa mga establisamento ug mahimong tulin ang ebalwasyon niini. MEL (BANATNEWS)
- Latest
