5 positibo sa drug test sa CLOSAP

CEBU, Philippines — Lima ka tawo nga nipahimulos sa plea bargain agreement ug nipaubos sa community service program sa City of Lapu-lapu Office on Substance Abuse Prevention kon CLOSAP ang nagpositibo sa ginadili nga drugas sa gipahigayon nga surprise drug test.

Suma pa sa pangu sa CLOSAP Garry Lao, 65 ka buok ang gipaubos sa drug test ug lima ang nagpositibo. Dugang pa niya nga pulos first timer ang 5 ug nagpasabot nga unang higayon pa kini sila maka-report.

Gipasabot ni Lao nga hatagan gihapon sila og kahigayonan pero kon magpositibo lang gihapon sa ikaduhang higayon, himoon nila ang pagpahibalo sa korte.

Ang maong programa gisugdan niadtong buwan sa Marso nga molanat lang ug unom ka buwan apan tungod sa pandemya ug mga quarantine status classification gipaabot kini sila nga motapos sa maong programa sa 1st quarter sa tuig 2022.

Ipaubos usab sila sa counselling aron sayran kung unsay nakatukmod kanila paggamit og balik sa ginadili nga drugas. —MEL (BANATNEWS)