Kapitan sa Brgy Calamba wa motugot sa prosesyon

CEBU, Philippines — Giklaro ni kapitan Victor “Jojo” Quijano, sa Barangay Calamba, nga wala siya mitugot sa pagpahigayon og procession sa Sitio Lower San Roque, nga nagsaulog sa ilang fiesta niadtong Domingo

Matud pa ni Quijano, nananghid ang mga opisyal nga magfiesta apan wala niya gitugot nga mag procession, apan mahimo sila mag motorcade ug wala usab kini mananghid nga dunay drum and bugle sa kalihukan.

Nakuhaan og video ang pagsaulog sa kapistahan diin makita ang mga tawo nga nagsayaw ug nilibot sa santos ngadto sa mga sitio.

Samtang si Konsehal Joel Garganera sa Emergency Operations Center sa Dakbayan sa Sugbo miingon nga nagpaabot na lang siya sa resulta sa imbestigasyon sa kapolisan ug sa Department of Interior and Local Government DILG sa maong insidente.

Nagkanayon si Garganera nga tungod kay nia pa kita sa pandemya hugot gyud nga gidili ang mga tapok-tapok ilabi na kun fiesta, gidili sab ang pagpahigayon og misa sa mga kapilya, ug gidili sab ang foot procession, ang gitugutan lang mao ang pag-motorkada sa santos.

Lakip sa giimbestigar ang Barangay Kapitan sa Calamba nga si Victor Quijano Jr. ingon man ang presidente sa kapilya.

Gi-angkon sa Vice President sa Lower San Roque Chapel nga si Jennifer Perez nga wala nila mapananghid ang drum and bugle apan wala kini nila pakuyoga sa procession ug nagpundo lang sa karsada.

Gitataw niya nga nisunod sila sa basic health protocols ug wala sab sila magkuwang sa pagpahimangno sa mga tawo nga mosunod sa social distancing.

Nangayo usab sila og pasaylo ngadto sa ilang kapitan gumikan sa maong hitabo.

Samtang si Acting Mayor Michael Rama sa iyang bahin mitataw nga gitugyan na niya sa EOC ug CCPO ang maong insidente apan mitataw nga wala’y exempted sa balaod.— MEL (BANATNEWS)