Gibuksan na ang radiology ug laboratory department sa CPH-Danao
CEBU, Philippines — Adunay mga bag-ong ekipo karon ang bag-ohay lang nga gibuksan nga radiology ug laboratory departments sa Cebu Provincial Hospital - Danao City.
Nikabat ngadto sa P14 milyones ang kantidad sa mga ekipo sa radiology department naglakip kini sa digital radiography, electrocardiogram machine, ultrasound machine ug uban pa.
Nasayran nga gipundohan kini pinaaig sa Health Facilities Enhancement Program (HFEP) sa Department of Health.
Matud ni Dr. Mary Ann Josephine Arsenal, chief of hospital sa CPH-Danao nga dako ang matabang niini dili lang sa mga residente sa Dakbayan sa Danao apil niini ang mga silingan nga lungsod sa kinto distrito.
Subay niini, gikataho nga 38 usab ka hospital beds nga adunay mattresses, bed side table, IV stand ug overhead table ang gidonar sa Church of Christ of the Latter Day Saints Area 70.
Si Gobernador Gwenodlyn Garcia maoy nangulo sa maong kalihokan uban nila ni Kongresista Duke Frasco sa kinto distrito, Integrated Provincial Health Office Chief Dr. Cristina Giango, DOH-7 Assistant Director Dr. Guy Perez, Prime Care Cebu Chief Executive Officer Dr. Peter James Aznar ug Cebu Provincial Police Office Director Engelbert Soriano.
Gibutyag ni Frasco nga nakaduso na siya og balaodnon sa kongreso alang sa pag -upgrade sa CPH-Danao gikan sa level 1 ngadto sa level 2 hospital.
“It was actually already passed to the committee level now it will proceed to the plenary and hopefully before the end of this session ma-pass na gyud to siya”, matud ni Frasco. —BDB (BANATNEWS)
- Latest
