Zafra: Dili pwedeng motambong sa kumbira sa silingan

CEBU, Philippines — Si Cebu City Councilor Philip Zafra nagkanayon nga bisan og ubos na sa Genaral Community Quarantine (GCQ) ang Dakbayan sa Sugbo irekomendar gihapon niya ang polisiya nga managpamilya lang ang magsalo-salo sa nagkadaiyang kumbira diha sa mga kabalayan.

Pasabot niini nga did-an gihapon nga manambong sa salo-salo o party ang mga silingan.

Matud ni Zafra nga dili gihapon lugakan ang pagpatuman sa health protocols bisan pa nga niubos na ang quarantine status sa siyudad ug gidid-an usab ang mga bisan unsa nga mga kalingawan sa mga pista.

Isip chairman sa committee on peace and order sa konseho sa Siyudad sa Sugbo suportado usab niya ang initiyatibo sa kapolisan sa pag-ban sa panaygon.

Matud usab ni Zafra nga ang pag-ban sa panaygon naimplementar kini sukad sa niaging tuig ug angayan nga ipadayon kini karong tuiga gumikan kay nagpabilin pa ang hulga sa COVID-19.

"Naa pa man ta sa pandemiya, pabilin gihapon nato nga hugtan ang pagpatuman sa health protocols bisan naka-GCQ na ta”, dugang ni Zafra. —BDB (BANATNEWS)