Anggulo sa kuha sa beach party Video gisusi’g maayo sa kapolisan
CEBU, Philippines — Ang Police Regional Office (PRO) -7 nagpadayon sa ilang imbestigasyon aron pag-ila kun kinsa ang mga organizers ug kung kinsa ang naghatag permiso sa usa ka beach party nga gipahigayon sa isla sa Camotes nga nakuha sa usa ka video.
Personal nga gimandoan ni Philippine National Police (PNP) Guillermo Eleazar si PRO-7 Regional Director Ronnie Montejo nga imbestigahon ang maong video nga nikatap sa social media.
Si Montejo mimando ang hepe sa Cebu Police Provincial Office (CPPO) nga si Police Colonel Engelbert Soriano paghimo og imbestigasyon bahin niini ug base sa pasiunang impormasyong nakaylap sa kapolisan ang nahisgutang beach party nahitabo kaniadtong Hulyo 10,2021.
Ang Camotes ubos pa sa Modified General Community Quarantine (MGCQ) tungod sa kadaghan sa mga kaso niini sa Covid-19.
"Sa MGCQ allowed pa ang 50 percent nga mag attend sa mga activities," matod pa ni Montejo kaniadtong Huwebes, Agosto 19.
"Initially pud kuno ang picture nga gi-submit, ang pagkuha bitaw niya kay ang angle murag daghan tan-awon but actually dili siya ingon ana. Ato lang lantawon karon ang result sa investigation kung kompleto na," matud pa ni Montejo.
Ilang gisubay kinsa ang nag-organisar niini lakip na kung kinsang mga opisyal sa LGUs sa lugar diin kini nahitabo aron iapil sa imbestigasyon.
Matud ni Montejo, kinahanglang dunay pagtugot sa mga lokal nga opisyales ang mga sama niini nga kalihokan subay sa guidelines sa IATF. —IBM (BANATNEWS)
- Latest
