Bontuyan nibwelta sa bashers sa mega isolation center

CEBU, Philippines — Nibwelta ang manager sa Cebu City Sports Center Jundel Bontuyan kalabot sa gipangsulti sa bashers nga giingong bati kaayo ang giumol nga mega isolation center sa maong pasilidad.

Si Bontuyan nipadayag sa iyang kasagmuyo tungod kay sa panahon karon aduna gihapoy mga kritiko bisan og gibuhat na nila ang tanan alang sa pagpangandam kon ugaling mapuno na ang ubang isolation centers.

Si Bontuyan nipadayag diha sa iyang social media account nga bisan walay nakaandam nga budget alang sa maong pasilidad gipangitaan kini og paagi sa kagamhanan sa siyudad nga matukod kini ilabi na ang pagdestino og mga personnel ug medical staff.

Giawhag niya ang katawhan nga motuman sa health protocols ug magpabakuna aron dili madangat sa maong isolation center.

Subay niini, giplanohan nga karong Domingo ipahigayon ang ceremonial ribbon cutting sa mega isolation facility sa Siyudad sa Sugbo diha sa CCSC.

Matud ni Julius Martin Angel, pangulo sa Engineering Division sa Local School Board nga ang gitrabaho nila karon sa maong isolation facility ang lugar alang sa mga staff nga i-assign unya diha ingon man ang ilang doffing ug donning area.

Giandam na usab nila ang triage sa lugar aron han-ay ang isolation facility ilabi na kon modawat na unya kini og COVID-19 patients.

Gibutyag ni Anghel nga usa usab sa ilang gipaspasan og trabaho ang supply sa tubig sa healthcare workers nga ma-assign unya sa maong pasilidad.

Bisan og holiday karong adlawa gikinahanglan nila nga motrabaho aron dali nga mahuman ang nahisgutang isolation facility.

Nasayran nga ang badminton area sa CCSC moabot sa 200 ka COVID-19 beds ang mahimong ibutang ug sa mga dance studio sa maong pasilidad gipreparar usab nila tungod kay posibleng anha ibutang ang pregnant women nga mataptap sa virus diin duol ra usab kini sa mga tambalanan kon aduna may mga emerhensiya.

Nunot niini, si Bontuyan nibutyag nga nasabotan nila sa opisyales sa siyudad nga ang iyang mga tawo maoy ibutang sa maintenance, utility ug security sa maong pasilidad. —Decemay P. Padilla/BDB (BANATNEWS)