DVMF nagmonitor sa karne nga gibaligya sa kamerkadohan

CEBU, Philippines — Hugot nga gibantayan karon sa Department of Veterinary Medicine and Fisheries (DVMF) ang kamerkadohan aron maseguro nga luwas ang mga gibaligya nga karne.

Lakip sa lagda nga gipatuman mao nga kinahanglan ang mga namaligya og karne adunay meat inspection certificate.

Tumong niini nga masiguro nga limpyo ug luwas ang karne nga kan-on sa katawhan.

Samtang sa ilang gipahigayon nga inspeksyon sa merkado sa Guadalupe sa miaging adlaw  adunay  nakit-an ang DVMF nga mga karneng baka nga dili na maayo ang kalidad.

Ang gisakmit nga karne sa baka miabot og 64.4 ka kilo ug dili na kini angayan nga kaonon.

Nasayran ang pagbaligya sa nadaot nga karne nakalapas sa mga probisyon sa DA A.O. No. 5, RA 9296 ug City Ordinance 2189.

Ang bag-ong naihaw nga karne dili angayan nga isagol sa mga daan nga gipabugnaw, frozen ug gipatunaw nga karne. —MEL (BANATNEWS)