Ang edad numero lang, 70-anyos nakahuman og tungha

CEBU, Philippines — Usa ka testamento nga ang edad nga 70-anyos numero lamang ug dili babag aron makakuha og edukasyon sama sa nabuhat sa usa ka lolo nga taga Vallehermoso, Negros Oriental.

Si Lolo Carlito Bulado, 70, bag-o lang nakakuha sa iyang diploma human nakahuman sa Alternative Learning System (ALS) didto sa tunghaan sa Maglahos Vallehermoso. Si Lolo Carlito ikatulo sa lima ka managsuon.

Apan kutob lang sa grade 3 ang iyang natapos human nagkabuwag ang iyang mga ginikanan. Namatay ang iyang amahan hangtud nga bisan asa nalang siya mipasilong aron mabuhi.

Bisan unsa nga trabaho ang iyang gisudlan sama sa welding, delivery, cook, driver ug uban pa.

Naminyo siya ug nakabaton og lima ka mga anak nga pulos nasab minyo hangtud ang iyang unang asawa namatay.

Naminyo pagusab si Lolo Carlito ngadto ni Romela Bulado, 38, nga duna na say anak. Sa ilang panaguban nakabaton sila og usa ka anak nga si Princess Claire Bulado, 8 anyos.

Nakatrabaho sa Carmen Copper Corporation si Lolo Carlito isip drayber sa dagkong truck kaniadto apan niretiro niadtong 2013.

Sa iyang pagretiro nibalik siya pagpamaneho apan ning higayona traktora apan kun magkadeperensiya ang makina, wala sab siyay kitaon.

Naaghat si Lolo Carlito pagbalik og tungha pinaagi sa ALS human nga gipangitaan siya og diploma sa mga kumpanyang iyang gi-aplayan.

Samtang siya nagtungha , ang iyang asawa nga si Romela todo ang suporta kaniya. Matud pa ni Romela nga pwerteng kugihana sa iyang bana aron lang adunay ikabuhi kanila.

“Sa akong kinabuhi nasinati nako nga ang dili makahuman sa pag eskwela dili matuman ang atong pangandoy. Bisan tuod taas na ang pangidaron ako malipayon,” matud pa ni Lolo Carlito.

Nanghinaot si Lolo Carlito nga madawat sa iyang gi-aplayan nga trabaho karon nga aduna na siya’y diploma nga ikapakita.— IBM (BANATNEWS)