Mayor Labella subling mipatim-aw nga siya dakong buhi

Cebu, Philippines — “Dakong buhi ug maayo ang kahimtang.” Kini maoy mensahe nga gipadangat ni Cebu City Mayor Edgardo Labella sa katawhan sa siyudad sa Sugbo human nga duna na say nanggawas nga mga estorya nga giingong namatay na siya niadtong Biyernes sa gabii.

Si Labella wala pa mabalik sa trabaho human kini na-admit sa tambalanan maong si Bise Mayor Michael Rama mao karoy acting mayor sa siyudad.

Si Labella adunay gihambing impeksyon ug maoy hinungdan nga kini na-admit sa tambalanan makaduha ka higayon. Apan ning kataposang pagka-admit sa mayor dunay nanggawas nga estoryang namatay kini sa tambalanan.      

Ang unang nigawas magduha ka semana na ang nilabay apan si City Administrator Floro Casas namahayag nga bakak ang mga balitang nanggawas bahin sa mayor.

Ug niadtong Biyernes, lain na sab susamang balita ang nikatap ug gipasa-pasa pa gani kini pinaagi sa messenger.

Pipila sa mga nanabi daw 100 porsiyento gyung sigurado sa impormasyong nitaliwan na ang mayor. Apan kwestyonable kaayo ang personalidad tungod kay dili man gani kini personal nga kaila sa mayor o sa pamilya niini.

Apan aron pagklaro sa tanan, nag-post si Labella diha sa iyahang official Facebook page nga nagpakupot kini og kopya sa The Freeman Newspaper ug sa iyang likod nga bahin ang Banat News samtang iya sab gisabak ang kopya sa The Philippine Star.

Pulos tanan isyu kagahapong adlawa Hulyo 31,2021 ang maong mga pamantalaan.

 “I would like to inform everyone na I’m alive and doing well. Kini tungod sa tanan mga nag ampo ug nagpadayag sa ilang pagsuporta. Daghan kaayong salamat ug mag amping kitang tanan,” sigon pa ni Labella sa post niini.

Si City Administrator Atty. Floro Casas Jr. miingon nga posibleng mogawas sa tambalanan si Labella sa sunod semana.

Si Casas miingon nga si Labella na maoy modesisyon kun mopasaka ba kini og kaso batok sa mga tawong nagpakatap sa maong estorya nga namatay na kini.

“Dili ko ka decide ana kay if ever unsa that would be the Mayor’s decision amo pa na gi discuss kang Mayor, naa man gyud gyud, possible na siya, everything is possible but I’m not sure lang knowing Mayor, dili lang sad nako siya unhan, ”sigon ni Casas bahin sa kinaiya sa mayor nga dili madinumtanon nga tawo.

Giangkon ni Casas nga nabalaka sila aning nagsige og gawas nga sayop nga balitang nagsige og tunglo sa mayor. (BANAT NEWS)