Gullas: Pasyente dili angay balibaran

CEBU, Philippines — Gihimakak sa kadagkuan sa Cebu South Medical Center o kanhi Talisay District Hospital nga mibalibad sila og pasyente kinsa nipauli nalang sa ilang balay apan didto namatay niadtong nakalabay nga semana.

Si Dr. Agustin Agos nipasabot ni Mayor Gerald Anthony “Samsam” Gullas nga si Danilo Rosales wala balibari sa tambalanan. Si Gullas nakisusi bahin sa maong balita. Matud pa niya nga ilang giproseso ang pag- admit kang Rosales kinsa mianha sa ilang tambalanan kay naglisod og ginhawa.

Apan ang nurse nga naghimo niini wala na makakita ni Rosales uban ang mga kawani sa barangay sa dihang padung na kini i-admit. Matud pa way tagtungod si Rosales sa dihang nianha sa tambalanan.

“Agos told me that they have never denied service to any patient.  He also told me that they do not only cater to Talisay City residents but the whole south of Cebu,” tipik sa Facebook post ni Gullas.

Si Rosales daan na gyud nga magsud ug gawas sa tambalanan matud pa sa mga silingan niini apan wala kini kabanay.

Nakighinabi sab ni Gullas ni Kapitan Benjie Cabigas kun diin magpuyo si Rosales ug gitug-anan siya niini nga gihangyo sa tambalanan ang duha ka silingan ni Rosales nga maoy magsilbing tagtungod samtang sila nangita pa sa mga kabanay niini.

Apan naglibog si Gullas kung asa dapit nga wala magkasinabtanay ang duha ka habig, nganong nipauli man si Rosales ug ang iyang mga kuyog nga taga barangay.

Nagkasabot sila si Gullas ug Agos nga kung walay tagtungod ang usa ka pasyente tugotan nilang pabantayan bisan dili kabanay.

“Mas maayo sad gani if they will allow social workers to serve as temporary “tagtungod” for patients who really don’t have one,” asoy pa ni Gullas.

Giklaro sab sa mayor nga ang CSMC gidumala sa nasudnong pangangamhanan ug dili sa ilaha.

Ang CSMC modawat sab og laing pasyenti nga gikan sa laing lugar.— IBM (BANATNEWS)