Alokasyon sa fuel sa garbage trucks sa barangay patas-an

CEBU, Philippines — Human gipasirado sa Environmental Management Bureau-7 ang transfer station diha sa Barangay Inayawan, Siyudad sa Sugbo gumikan sa environmental violations gipakigtagboan dayon sa kadagkoan sa kagamhanan sa siyudad ang mga apektadong Barangay ilabi na diha sa south district. Si Atty. Floro Casas Jr., city administrator nagkanayon nga ubos sa kamandoan ni Mayor Edgardo Labella gipakigtagboan nila ang mga barangay kapitan sa south district kinsa maoy apektado sa pagsirado sa transfer station.

Ang south district gilangkuban kini sa 34 ka barangay ug nabalaka kini sa labayan sa ilang basura ug naproblema usab sa fuel allocation sa garbage trucks tungod kay layo na sila og labayan ngadto sa Barangay Binaliw ug ang kausaban sa collection schedule sa mga garbage truck.

Matud ni Casas nga i-negotiate nila ang landfill kabahin sa direktang paglabay og basura sa mga barangay sa siyudad ug gimandoan na sa mayor si Atty. June  Maratas sa General Services Office nga patas-an ang fuel allocation sa garbage trucks sa barangay.

Si Atty. John Jigo Dacua sa Department of Public Services nibutyag nga gi-cluster nila ang mga barangay sa south district aron ang trucks sa DOCAST ingon man ang truck sa DPS motabang sa pagkolektar og basura kon ugaling adunay mga lugar nga dili maagian sa garbage trucks.

Nasayran nga ang DPS matag adlaw makakolekta og 700 ngadto sa 800 ka toneladang basura diin duha ka shift ang pagkolekta sa ilang basura magsugod kini sa alas 11:00 sa gabii hangtud sa alas 8:00 sa buntag ug alas 3:00 sa hapon hangtud sa alas 11:00 sa gabii.

Samtang si Casas nagkanayon nga dili manghilabot ang siyudad kabahin sa legal action tungod kay ang service provider man ug ang tag-iya sa transfer station ang adunay kontrata ug responsibilidad usab nila ang pagkorehir sa mga sayop nga nakita sa EMB-7. —Sanden J. Anadia/BDB (BANATNEWS)