Nagtipun-og nga basura sa inayawan susihon sa emb-7

Cebu, Philippines — Gikatakdang magpadala og mga inspectors ang Environmental Management Bureau -7 uban sa pakigalayon kang Inayawan barangay captain Kirk Bryan Repollo aron inspeksyunon ugmang adlawa Hulyo 5, 2021 ang Inayawan Transfer Station sa maong barangay.

Si Repollo nalipay nini sanglit matud niya nabalaka na sila sa sitwasyon sa mga gitambak nga basura karon diha sa ilang barangay. Matud niya ang baho sa basurang gipangdala diha sa transfer station naabot na didto sa Brgy. San Roque sa Talisay City.

“Daghan na kaayo og nireklamo sa kabaho. Ang baho sa basura niabot na sa San Roque, Talisay City.  Unya diri sa amoang barangay, mga one kilometer gikan sa transfer station masimhot na ang kabaho sa basura,”matud ni Repollo.

Sumala pa niya mura na og bukid kataas ang basura ug nabalaka siyang modahili kini ilabi na karong nagsige og bunok ang uwan ug nameligro ang mga mamasurahay sa lugar.

Si EMB-7 regional director Lormelyn Claudio miingon nga mopadala sila og grupo aron mapugngan ang mahitabong aksidente.

“By Monday na ‘yung inspection. We will coordinate with the barangay captain for a joint inspection,” matud pang Claudio sa igsuong pamantalaan sa Banat News nga The Freeman kagahapon.

Napundok ang mga basura sa maong transfer station human ang ARN Central Waste Management Inc. ang landfill operator  sa Brgy. Binaliw wala na motugot nga makalabay og basura sa ilaha ang mga trak sa basura sa pribadong hauler sa siyudad nga Docast Construction/JJ & J Construction and General Supply  sugod Hunyo 19, 2021.

Giingong wala kabayad ang Docast sa P18 milyones nga bayrunon apan ang tagdumala sa maong hauler nga si John David atol sa press conference niini niadtong Hunyo 26, nabayran na nila kini.

Ang abogado sab sa ARN nga si Atty. Elias Espinoza nihimakak nga nabayran na ang obligasyon sa Docast.

Human sa pamahayag ni Espinoza niisyu og tulo ka tseke nga nagkantidad og P6,225,301.33 matag usa isip bayad sa ilang balayrunon apan matud sa abogado sa ARN ilaha kining giuli kay post dated checks kini nga may petsang Hulyo 15, Agusto 15, ug Agusto 31, 2021.

Matud pang Espinoza, ilang gisultihan ang mensahero sa Docast nga ipausab ang mga petsa apan wala na kini mibalik pa. (BANAT NEWS)