Nagtipun-og nga basura sa Inayawan tukion sa konseho

CEBU, Philippines — Gikatakdang mopatawag og executive session sa umaabot nga mga adlaw ang mga sakop sa konseho sa Siyudad sa Sugbo aron hisgotan ang nagpadayon nga problema sa basura.

Sa tigom kahahapon  sa mga  konsehal nagkasabot sila nga ipatawag ang  Cebu City Treasurer’s Office(CTO), Department of Public Services (DPS) , City Budget Office ug ang mga kontraktor sa transfer station diha sa Inayawan ug sa landfill sa Binaliw.

Tumong niini nga mahatagan og katin-awan ang tanan sa isyu sa pagtipun-og sa mga basura diha sa Inayawan.

Sayo pa, nitumaw ang report sa niaging semana nga giingong wala kabayad ang contractor sa transfer station sa Inayawan nga DOCAST ngadto sa landfill operator sa Binaliw nga ARN Waste Management Inc., Sa nangaging pamahayag sa general manager sa DOCAST John David Javier nihimakak kini sa report nga aduna sila’y obligasyon nga P17.6 milyones ngadto sa landfill operator sa Binaliw ug na-settle na nila ang ilang obligasyon. Samtang ang legal counsel sa ARN Atty. Elias Espinoza nihimakak sa pangangkon sa DOCAST.

Nitumaw karon ang isyu kalabot sa taas nga  linya sa  mga barangay garbage truck diha sa Inayawan.   

Sa laing bahin, si Mayor Jonas Cortes sa Dakbayan sa Mandaue niawhag sa mga Mandauehanon sa pagtabang sa kagamhanan pinaagi sa tukmang paglabay sa ilang mga basura diin mao  kini ang hinungdan sa mga nasinati nga baha.          

Si Cortes makiglambigit kini sa Department of Public Works and Highways alang sa iyang plano nga pagpalawom ug pagpalapad sa ilang drainage systems.  Romeo T. Limpangog/BDB (BANATNEWS)