Cuenco: 963 ka TPUJ nga nagbiyahe karon kuwang ra
Cebu, Philippines — Si Cebu City Councilor James Anthony Cuenco, chairman sa Cebu City Jeepney Task Force nagkanayon nga sa pagkakaron naa sa 963 ka Traditional Public Utility Jeepneys (TPUJs) ang nagdagan sa kadalanan sa siyudad.
Apan gipanglantawan nga mosaka pa kini tungod kay aduna pay mga aplikante nga padayon niproseso sa mga gikinahanglan aron tugotan sila nga makabiyahe.
Matud ni Cuenco nga ang maong gidaghanon sa TPUJ nga nagdagan na sa siyudad kuwangan gihapon kini nga maka-akumodar sa mga sumasakay.
Dihang gisugdan nila ang rollout sa TPUJs sa Cebu City naglaom sila og 1,300 ka TPUJs ang mosulod apan sa pagkakaron naa pa lang sa kapin 900 ang nagdagan sa kadalanan sa Siyudad sa Sugbo.
Si Cuenco nibutyag nga nakadawat siya og report nga diha sa Barangay Kalunasan, Oppra ug Quiot giingong kuwang ang transportasyon tungod kay walay jeep nga mosulod.
Si Cuenco nipasabot nga ang Balik Pasada Permit nga gihatag sa iyahang buhatan ngadto sa mga drayber ug operator sa TPUJ naghatag kanila og pagtugot nga maka-operate sulod sa 24 oras.
Ug depende na kini sa drayber ug operator kon mobiyahe sila sulod sa 24 oras diin exempted sila sa curfew hours nga gipatuman sa siyduad.
Apan nasayran ni Cuenco sa pagkighinabi niya sa mga drayber nga inig abot sa alas 8:00 sa gabii mingaw na ang palibot ug wala nay pasahero nga manakay hinungdan nga ang mga drayber dili na mobiyahe sa maong oras aron dili usab sila maalkanse. (BANAT NEWS)
- Latest
