Pagdugang og transfer station sa basura sa Inayawan gitinguha
CEBU, Philippines — Gitingoha karon ni Konsehal Eduardo Rama nga banhawon napud ang iyang sugyot nga dugangan og transfer station sa mga basura ang Siyudad sa Sugbo.
Suma pa niya nga dili igo ang kasamtangang transfer station diha sa Inayawan.
Kinahanglan matud pa nga gawas sa Inayawan (South), angayan pud butangan ang central ug north area.
Kun daghan ang transfer stations, giingong dili na mobiyahe og layo ang mga barangay garbage truck busa mas paspas ang serbisyo niini sa lugar nga gialagaran niini.
“Sige nako og suggest anang butanga,” matud pa sa konsehal.
Nasayran nga nikisaw karon ang isyu kalabot sa taas nga linya sa mga barangay garbage truck diha sa Inayawan.
Kahinumdoman sa miaging adlaw, nakadawat og report si Associations of Barangay Council President Franklyn Ong nga wala na dawata sa landfill diha sa Barangay Binaliw ang mga barangay garbage truck nga niresulta na hinoun sa pagkatipun-ok sa mga basura diha sa Inayawan transfer station.
Ang kapitan sa Inayawan nga si Kirk Bryan Repollo nipadayag nga pait na gyud kaayo ang kahimtang sa iyang barangay.
Nasayran nga gawas sa nagtipun-ok nga basura, naguba napud ang kadalanan sa maong dapit. “Louya kaayo ang among barangay, dugay na kaayo na namo nga problema”. suma pa ni Repollo.
Samtang si Acting Mayor Michael Rama nipatawag dayon og tigom kagahapon kauban ang Department of Public Services (DPS), Department of Engineering and Public Works (DEPW) ug mga representante sa executive department. MEL (BANATNEWS)
- Latest
