P200 milyones itagana alang sa flood control program—Guardo

CEBU, Philippines — Si Konsehal Jerry Guardo atol sa iyang privilege speech sa niaging adlaw nituki kini sa nagkagrabeng problema sa baha sa siyudad matag mobunok ang kusog nga uwan.

Pipila sa unod sa iyang privilege speech mao ang mga rekomendasyon nga gipaagi og resolusyon alang sa mahimong solusyon sa maong problema.

Si Guardo maoy chairman sa committee on infrastructure sa konseho sa Siyudad sa Sugbo ug matud niini nga kinahanglan usab ang pagpadayon sa de-clogging sa mga kanal ug desilting sa mga sapa nga gihimo sa  Department of Engineering and Public Works (DEPW)  pinaagi sa Task Force Minus-Baha ug Cebu City Environment and Natural Resources (CCENRO) River Troopers.

Gihangyo usab niya ang DEPW nga hatagan og prayoridad ang pagpangandam sa   POWE (program of works and estimates) alang sa mga proyekto sa flood prone barangays   sama sa mga barangay sa T. Padilla, Tejero, Tinago, Pari-an, Day-as, Lorega San Miguel, Tisa ug Guadalupe.

Ang executive department gihangyo usab nga motagana og igong pundo sa 2021 Supplemental Budget ug Annual Investment Plan nga P200 milyones alang sa flood control ug mitigation programs sa siyudad. Ang Department of Public Works and Highways giawhag kini nga i-review o susihon og balik ang kasamtangang mga taytayan sa T Padilla, MJ Cuenco ug McArthur aron masuta kong makasugakod pa ba kini kon maagian og dakong baha.

Giawhag usab niya nga mo-purchase og amphibian excavator ang executive department aron mamentinar ang dredging sa mga sapa ug creeks.

Sa laing bahin, ang kagamhanan sa siyudad pinaagi sa Coastal Management Board mopahigayon og laing “cleanup challenge” karong Sabado subay kini sa pagsaulog sa  Philippine Environment Month ubos sa tema nga “Clean Cebu, Healthy Cebuanos".

Ang mga lugar nga sentro sa maong kalihokan mao ang Innodata Cebu, Tinago Tejero Bridge- Kamputhaw River, T. Padilla Market, Barangay Ermita, Pasil, Pasil 2, Sawang Calero, Pahina San Nicolas, Barangay Sambag, Sudlon Bridge, Mambaling, Tisa Elementary School, Bulacao, Mananga River, Kabangkalan, Basak San Nicolas , SRP Tower , Il Corso Coast ug ang Campanario Shoal. —Leonel B. Quillo /BDB (BANATNEWS)