Dugang 46 ka TPUJ nakabalik og biyahe

CEBU, Philippines — Sukad gianunsiyo ang pagbukas sa tanang rota sa PUJ sa Cebu City niabot na sa 46 ka TPUJ ang dugang nakabalik og biyahe.

Ug gilaomang mosaka pa ang maong gidaghanon tungod kay padayon ang pagpanawat sa Cebu City Jeepney Task Force og mga aplikante alang sa Balik Pasada Program.

Nakatabang usab ang gipahigayon nga “one stop shop” alang sa mga drayber nga gusto na nga mobalik sa pagpamasahero.

Naumol ang one stop shop aron madali ang pagproseso sa mga drayber sa tradisyonal nga PUJ nga gusto na nga mobalik og biyahe human gibuksan na ang tanang rota sa Siyudad sa Sugbo.

Nakig-alayon ang siyudad  sa Land Transportation Office-7 ug Land Transportation Franchising and Regulatory Board-7  aron makabalik sa pagbihaye ang traditional jeepney.

Dakong bentaha ang maong programa ngadto sa mga operator ug drayber tungod kay dili na sila mahasol sa pagbalhin-balhin sa nagkadaiyang ahensiya sa gobiyerno diin gipahimutang man kini diha sa Plaza Sugbo.

Gawas sa naandan nga mga inspeksiyon sa mga unit ipaubos usab sa seminar ang mga drayber nga pagadumalaon sa Cebu City Transportation Office. (Sanden J. Anadia/BDB)

147 nakadawat og hinabang sa Cebu City

Niabot ngadto sa 147 ka beneficiaries nga napaubos sa screening sa Division of Welfare of the Urban Poor (DWUP) ang nakadawat na sa ilang P5,000 nga cash grants gikan sa kagamhanan sa Dakbayan sa Sugbo pinaagi sa Micro Enterprise Development Fund Program.

Ang 100 ka benepisyaryo nagikan sa Barangay Bulacao samtang ang 47 niini gikan sa Barangay Quiot parehong sa Dakbayan sa Sugbo.

Sa taho sa Cebu City Public Information Office, nagpasalamat si Michelle Bacurnay, 23-anyos taga Sitio Nangka, Barangay Quiot ngadto sa kagamhanan tungod kay makatabang sa ilang panginabuhian ang nadawat nila nga assistance.

Sunod nga target sa kagamhanan mao ang mga benepisaryo nga taga north district. Atol sa pag-apod apod sa assistance gipaneguro ang pagpatuman sa health protocols. BDB (BANATNEWS)