Bantay Dagat sa Liloan milusad sa Sea Patrol ug coastal outpost

CEBU, Philippines — Gilusad sa Lungsod sa Liloan ang ilang Sea Patrol ug bag-ong coastal outpost diin ilang giturn-over ang pipila ka kahimanan nga mahimong magamit sa ilang Bantay Dagat.

Uban sa Grand Horizon, usa ka private firm, ang LGU nihatag og jetskisbug speedboats ngadto sa mga personnel sa Bantay Dagat sa lungsod.

Usa ka memorandum of Agreement ang gipirmahan sa LGU ug sa pribadong kompaniya

Segun sa facebook post sa Municipality of Liloan walay gigasto ang kagamhanan sa lungsod sa pagpalit sa maong mga sea vehicles.

Kini tungod kay ang ilang private partner nga mao ang Grand Horizon mao ang nihatag sa jetskis ug speedboats alang sa mga sakop sa Bantay Dagat aron makapatrolya sa kadagatan.  

Mahimo usab nga magamit ang maong kahimanan panahon sa emerhensya ingon man paggukod sa illegal nga mananagat ug sa kinatibuk-ang pagprotihir sa kadagatan sa Liloan.

Gidungan sa maong kalihokan ang pag inagurar sa bag-ong Bantay Dagat Outpost.

Dili momenus  14 ka fiberglass fishing boats ug nagkadaiyang  kagamitan sa pagpanagat ang giturn over ni Mayor Christina Frasco ngadto sa pipila ka  fishermen’s associations sa Liloan pagtabang sa ilang panginabuhian. Le Phyllis F. Antojado/MEL

Daycare Teachers gibansay alang sa modular nga pagtudlo

Gipaubos sa pagbansay bansay ang mokabat sa 42 ka magtutudlo sa daycare sa Dakbayan sa Talisay alang sa modular nga paagi sa pagtudlo.

Kini maoy gipahibawo ni Felipa Solana, pangu sa City Social Welfare and Development (CSWD).

Matud pa niya nga ila kining preparasyon aron sa paghimo na unya sa home-based nga pagtudlo.

Asoy pa ni Solana nga sama sa Department of Education (DEPED) ila kining gihimo gumikan kay wala pay kasiguroan kun kanus-a mabalik ang face to face classes.

“Home Based Activity Sheet ihatag sa parents, ang parents tagaan ug orientation ug session before ihatag then mag feedbacking inig submit kay ang ginikanan mao ang tudloan,” sigon pa ni Solana.

Ang day care mao kini ang sinugdanan sa bata nga motungtong sa usa ka learning facility.

Si Mayor Gerald Anthony “Samsam” Gullas Jr. nalipay sa maong kalihukan aron ang mga bata dili usab mauwahi sa angay nilang makat-onan.

Siya nipasalig og kagamitan sa 42 ka mga magtutudlo sama sa printer ug uban pa nga kinahanglan sa modular nga pagtudlo. MEL (BANATNEWS)