Langyaw nga nag-atubang og mga kaso sikop sa NBI
CEBU, Philippines — Usa ka langyaw gikan sa Southern Europe kinsa nag-atubang og mga kaso ang nadakpan sa National Bureau of Investigation-7 kagahapon sa buntag diha sa Lungsod sa Compostela.
Ang nadakpan mao si Steve Hidosan, 60-anyos kinsa adunay pending nga mga warrant of arrest niadto pang tuig 2013 nga giluwat sa huwes sa Reginal Trial Court (RTC) Branch 61 sa Angeles City, Pampanga.
Si Hidosan nag-atubang kini og seven counts sa kasong child prostitution ug sexual abuse ug eight counts sa human trafficking.
Matud ni Atty. Rennan Agustus Oliva, direktor sa NBI-7 nga ang NBI Anti-Organized Crime Division nga nagbase sa Manila ug ilang agents sa NBI-7 maoy ni-serve sa WOA batok kang Hidosan.
Si Agapito Geirran, special investigator sa NBI-7 nagkanayon nga tag P200 mil ang piyansa sa matag count sa kasong child prostitution samtang walay piyansa sa human trafficking.
"Said warrants were served against Steve because he did not appeared to several court summons", matud sa NBI-7.
Si Hidosan giingong wala kini napakita og bisan unsang dokumento sa iyang pagpuyo sa Sugbo.
Giingong si Hidosan nangangkon nga 10 na siya katuig nga nagpuyo sa Sugbo ug nihimakak kini kabahin sa maong mga kaso batok kaniya diin nagbuhi kini og mga hayopan diha sa Lungsod sa Compostela ug aduna na kini duha ka anak.
Nasayran usab nga ang suspetsado aduna kini asawa didto sa ilang nasud apan nagbuwag na sila. Si Hidosan gikatakdang dad-on balik ngadto sa Pampanga aron ipresentar sa korte. (BANAT NEWS)
- Latest
