Kita sa South Bus Terminal misaka na

Cebu, Philippines — Usa ka tuig ang nilabay human nag sugod ang pandemya sa coronavirus disease, nag sugod na og balik pagsaka ang kita sa Cebu South Bus Terminal (CSBT).

Matud ni Carmen Quijano ang manager sa CSBT, aduna nay pagsaka sa kita kon itandi sa niaging tuig nga wala gyud tungod kay nagsarado og pila ka buwan tungod kay gipaubos man ang Probinsya sa Enhanced Community Quarantine (ECQ).

Human sa ECQ ug nabalik na og sugod ang operasyon sa terminal, ang kita niini sumala ni Quijano dili ra moabot og one million matag bulan.

Karon tuiga, moabot na og P2 million ngadto sa P4 million ang koleksyon sa terminal matag bulan.

"Though dili pa ta ka cope up gyud sa atong income like what happened before pero karon okay na, ni increase na. Increase na og mga 2 million per month" matod ni Quijano

Sa wala pa ang pandemya sa COVID-19, ang kita sa CSBT kada bulan moabot sa P7million. Gikan kini sa kolekyon sa mga bus nga nag park diha sa terminal, renta sa mga stalls ug bayad sa pag gamit sa CR.

Ang CSBT maoy usa sa mga naghatag og income sa Probinsya sa Sugbo nga naa nahimutang sa dalan Natalio Bacalso Dakbayan sa Sugbo.

Mokabat sa 30 ka mga bus operators o companies ang mag operate sa maong terminal.

Samtang niadtong Mayo 18, 2021, gilusad sa CSBT ang centralized automated ticketing system diin ang mga pasahero dili na mobayad sa mga bus sa ilang pletehan ug igo na lang mopalit og tap cards o Suroy-Suroy cards o kadtong one time QR code ticket aron maoy gamiton nga makasulod sa terminal ug makasakay sa bus. (BANAT NEWS)