Mga batan-on gitudloan sa pagpananom
CEBU, Philippines — Gisugdan na sa Cebu City Agriculture Department (CAD) ang pagtudlo sa kabatan-onan kun unsaon pagpanguma.
Usa kini sa pamaagi nga mamintinar gyud ang igong supply sa pagkaon ingon man usab ang pagpangandam sa transisyon sa sumusunod nga henerasyon sa mag-uuma.
Suma pa sa pangu sa CAD nga si Joey Baclayon nga dili malikayan nga magkatigulang gyud ang ubang mag-uuma ug ang uban kanila mohunong sa pagpananom ilabi na kun duna nay gipamati sa lawas.
“Bisan nag-eskwela ka or nagtrabaho ka, puwede gyud ta magkat-on sa pagpananom ilabi na sa bakante nato nga oras,” matud pa ni Baclayon.
Sa pagka-karon kapin na sa 30 ka batan-on gikan sa nagkalain-laing barangay ang nisalmot sa maong programa ug gipaabot nga managhan pa kini sanglit padayon ang pagbisita sa CAD sa nagkadaiyang barangay.
Kun mahuman na ang ilang pagtuon, abagan usab sila nga makakuha og loan nga dunay ginagmay lang nga tubo aron makasugod na sa dugang hugna sa ilang panginabuhian. MEL (BANATNEWS)
- Latest
